香港人可能慣咗搭車去海洋公園就有得睇大熊貓，但大家有冇諗過如果外國嘅動物園想引入熊貓要使幾多錢？《日經亞洲》調查發現，中國多年嚟同海外動物園簽訂嘅租借大熊貓協議，加加埋埋為中國帶嚟近2.8億美元嘅收益！不過有外國動物園因為負擔唔起高昂嘅租借費同養育成本，公開表示想將大熊貓還返畀中國。
養熊貓一年開支高達160萬美元
《日經亞洲》嘅報導以芬蘭艾赫塔里動物園（Ahtari zoo）作為例子。國家主席習近平喺2017年訪問芬蘭時宣佈將會租借一對大熊貓畀芬蘭，租借期為15年。大熊貓Lumi及Pyry當年抵達艾赫塔里動物園後深受歡迎，有艾赫塔里居民形容呢兩隻大熊貓嘅人氣甚至超過埋聖誕老人，艾赫塔里亦希望兩隻大熊貓嘅到來可以促進當地旅遊業發展。
據傳媒報道，動物園除咗每年要支付100萬美元作Lumi及Pyry嘅租貸費，仲耗資近870萬美元建造咗一座熊貓館。雖然園方未有公開一年要畀幾多錢中國，但動物園執行長Arja Väliaho向媒體透露，佢哋一年總共花費約160萬美元喺一對大熊貓身上。冇計啦，熊貓又偏食、又需要大量空間，真係唔係咁易養。美國亞特蘭大動物園嘅前執行長仲講過，養大熊貓嘅成本比養大笨象高出足足五倍！
養熊貓難逃蝕錢命運？
不過艾赫塔里動物園好快就發現現實並不如佢哋想象咁美好——Lumi及Pyry一開始的確吸引到好多遊客入園，動物園2018年嘅營業額係2017年嘅兩倍有多，但大家對熊貓嘅熱情喺2019年開始逐漸減退，其後疫情爆發、俄烏開戰，導致入園嘅遊客越嚟越少。到咗今年年初，艾赫塔里動物園終於忍唔住出聲，表示想將Lumi同Pyry提前送返中國，因為佢哋就嚟養唔起一對大熊貓了。
除咗芬蘭，馬來西亞都有同中國建立熊貓外交。馬來西亞政府曾經喺2016年計過數，如果佢哋要租借一對大熊貓10年，加埋就要使超過1.51億令吉，按當時匯率計算，即係約3,500萬美元。而且養大熊貓冇話保證一定可以回本，《華盛頓郵報》喺2005年發表文章稱，美國四間動物園飼養大熊貓4年嘅開支比佢哋喺大熊貓身上獲得嘅收入多出3,300萬美元。
租熊貓要錢，養熊貓又要錢，就連熊貓生仔都要額外再俾錢。根據協議，飼養大熊貓嘅動物園必須為每隻喺海外出世嘅熊貓BB向中國支付額外費用，而且呢啲喺外國出世嘅熊貓BB作為中國嘅財產，必須要喺2至4歲前送返去中國。《日經亞洲》嘅報導仲提到，如果大熊貓喺租貸協議期間喺動物園內死亡，動物園需要向中國賠償50萬至100萬美元。估唔到國寶唔止可以做外交，仲係另類出口。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
