對於基層市民嚟講，年薪400萬嘅高官自稱中產已經係一件奇事，但近日一項調查顯示，美國有唔少擁有過百萬美元資產嘅有錢人同樣覺得自己唔算有錢，甚至仲有部分百萬富翁認為自己好窮！睇嚟有錢人同窮人對「富有」、「中產」同「貧窮」嘅定義真係有好大出入，照咁計法可能fg月入50k都只係普通貧民……
Ameriprise Financial今年訪問咗3,000名以上擁有至少100萬美元可投資資產嘅百萬富翁，結果發現有成31%嘅受訪者覺得自己只屬於中產階級，60%受訪者認為自己嘅資產同收入屬於中上水平，覺得自己富有嘅受訪者只得約8%，而剩餘嗰1%嘅受訪者就話自己好窮甚至係非常窮。
根據財務顧問公司SmartAsset嘅數據，美國家庭年收入中位數約為75,000美元（約58萬港元），而年收入達652,657美元（約509萬港元）嘅家庭已經比99%嘅美國家庭富裕。
如果以此作為標準，咁擁有七位數資產嘅美國人的確應該被歸類為「有錢人」，不過部分百萬富翁依然覺得自己背負住沉重嘅經濟負擔。《紐約郵報》指出，美國房地產市場飽受高額借貸成本困擾，而且當地物價高企，育兒、租屋、買車同日用品嘅成本高昂，難怪連百萬富翁都覺得生活壓力大。
除咗Ameriprise Financial嘅調查，Bloomberg今年亦訪問咗1,000名年收入175,000美元以上嘅美國人，結果發現有25%受訪者覺得自己好窮或者收入只係勉強過得去。就算受訪者中不乏企業老闆同專業人士，但只有50%嘅人覺得自己生活得舒服，認為自己富有嘅人更只得約25%。根據Bloomberg報導，部分覺得自己窮到就嚟破產嘅受訪者其實年收入高達500萬美元。25%嘅高收入受訪者自認為自己唔會比父母更有錢，近60%人覺得佢哋仍然要擔心錢銀問題。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
