專欄｜新聞稿最緊要係新！（關公妹）

話說，今朝一早就收到阿客電話，又有生意「益」我喇！

阿客：「阿妹，我個活動咪完咗嘅，你幫我寫份新聞稿，下星期出咗佢！」

關公妹：「咦！你個活動上星期已經完咗喎，而家先話出新聞稿嘅？

阿客：「係呀！唔急，慢慢做！」

出新聞稿竟然會唔急？

關公妹：「嗯，都完咗成個星期，今日出都嫌有啲遲呀！會唔會有啲咩最新嘅消息公布呀？」

阿客：「又真係冇喎！吖！一係順便回顧返我哋活動嘅設計項目曾經贏得2018設計獎項？

喂？等陣先？拎咗2,018個獎都話有啲嘢講下？你講緊2018年？6年前喎老細！係跌咗落結界定咩呀？

理智要我要冷靜！深呼吸一下！

關公妹：「6年前就唔好喇！定會唔會有冇啲數據可以發佈下？或者下一次活動嘅資訊咁？」

阿客：「又真係冇喎！其實想出下新聞交下功課咁啫！」

呢一刻雖然我把聲好客氣，但係我雙眼已經反到上咗外太空！

新聞喎！新聞個「新」字你知唔知點解？新聞個「新」即係新！即係啲嘢要新！各大media都係要搶先報導新聞，你啲舊聞點解media要出呀？你要交功課都比啲新料嚟吖！

我都好樂意同阿客解釋返。

關公妹：「真係唔得呢！就算而家出稿講圓滿結束，都未必有media肯出㗎！如果你真係要交功課嘅，會唔會有budget落下ad咁呀？合作咗咁耐都唔想呃你，就咁出新聞稿大家白做㗎咋！(下刪500字)…… 所以真係做唔到呀！」

出新聞稿唔係是但作篇文send出去就有media報導咁簡單！想得到media嘅垂青，肯出你篇稿，首先係新聞價值，即係有噱頭？有重要資訊？仲有要搵啱版面？但係回歸基本步，首要條件係「新」呀！新聞唔新，咁仲叫新聞咩？
關公妹筆記

【Finance730 專欄作家：關公妹💛 @kwankungmui 】

關公妹，係一名從事公關工作嘅九十後，係一名每日都喺食物鏈最低層打滾嘅終極大打雜。PR唔係萬能，但偏偏好多人以為PR乜嘢都可以變到出嚟，於是就訓練出我今時今日過五關斬六將嘅身手去拆彈，就算紅都面晒，硬著頭皮都一樣頂硬上，各位敬請賜教！

更多Finance730各行各業專欄