話說阿客嚟緊要搞一個新產品發佈會，所以約咗我哋上佢公司開會。做咗嘢咁耐，有時都唔明白點解阿客會覺得自己係全世界第一個推出佢所講嘅「新」產品，明明同類嘅產品已經推出咗好幾年…好啦，入正題了！
阿客：「總之，我要賓客一嚟到就有好WOW，好high tech，好cyber嘅感覺！嘩！你想像下一入到嚟我哋會場，令到佢哋覺得自己入咗數碼世界咁，有冇得搞？」
入數碼世界？被選中嘅細路？數碼暴龍呀？
阿客好興奮：「即係好似阿凡達入咗虛擬世界咁得唔得呢？」
咦？有啲諗法喎！原來唔係數碼暴龍係阿凡達！
話口未完再補多句：「吖！我哋整部機，邀請函入面會有一個獨有嘅QR code，每一個賓客嚟到現場去部機度自助掃個code就可以得到一個LED嘅名牌，連埋公司名嘅！仲有呀，我之前見到朋友個活動有啲project mapping投射落個玻璃樽度！我想加個咁樣嘅表演呀！好勁呀，真係好勁呀！」
Project mapping效果
乜咁樣真係好勁咩？見到佢個沾沾樣，作為一個專業嘅公關，當然有做好表情管理！其實LED名牌咪啫係夜場保安嗰啲！Project mapping 做到係靚嘅！但係又虛擬世界，又發明部機，又表演咁，即係有幾多budget先？
阿客：「呢個係公司今年推介嘅重點產品，budget一定唔會少啦！幾十萬走唔甩！你做咗proposal先啦！」
幾十萬即係幾多先？30萬又係幾十萬，90萬又係幾十萬…
最後幾多十萬就唔講啦！睇返阿客budget，名牌方面，可以「人手自動化」，搵人掃code再搵返個名牌畀你，但係LED名牌就做唔到喇，膠名牌啦！用唔起LED wall？咁同你用返普通佈景板加返啲設計，加返啲燈帶閃動下咁樣好喇啩？至於說好的表演，最後變咗入場賓客每人皆可獲贈一個差唔多10年前興起過嘅hologram projector！叫大家掃code播片，再將個projector放喺電話屏幕上面欣賞，都叫完咗客心願嘅。
👩💼關公妹筆記💼
今次客嘅要求係high tech同cyber，呢兩樣嘢其實好抽象！想要數據庫feel？定係未來城市feel先？喺呢個時候再問客人都可能冇咩用，因為佢都唔知自己想要咩，建議可以搵多幾款唔同reference，即係好似茶記咁俾個menu佢，ABCD餐，睇下邊款啱口味。好多客人講到天花龍鳳，帶人遊西北東！唔緊要嘅，我哋可以做到嘅就係睇餸食飯，帶返佢落地，望住個budget，盡量比一啲可行嘅建議。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
