專欄｜遇上清朝嚟嘅客人（關公妹）

話說，最近公司同一間餐廳合作，要幫手邀請KOL試食！Send咗幾個KOL畀餐廳過目，好快就approve咗！好順利！

由於呢間餐廳口碑好，又有新嘅主題，加上阿客好識做，仲送咗free flow 紅白酒俾佢哋，KOL們都好高興！又美酒又佳餚，今次拍出嚟啲嘢一定靚仔啦！

突然之間，阿客卻言又止，由頭先嘅笑笑口E人mode，變咗做I人尷尬mode，拉我埋一邊……

阿客：「其實我見佢哋幾個都幾滿意我哋啲嘢食，頭先拍咗啲shot仲俾我睇添！但係呢，有一個KOL唔知點咁，頭先啲同事向我投訴，話佢哋唔係幾檢點……」

唔係講笑，即刻淆淆地！

關公妹：「吓？佢哋做咩呀？係咪自己叫咗啲試食唔包嘅item呀？定係拍片影響到其他客人？我睇下點樣處理吖！」

阿客：「唔係，唔係！佢哋冇亂叫嘢食，仲讚我哋啲嘢正，話會好好幫我介紹添！」

關公妹：「咁佢哋即係做咗啲咩唔檢點嘅事呀？」

阿客：「唉，我都唔知點講！同事影低咗！我俾啲相你睇！」

我黑人問號咗……

關公妹：「佢哋有咩問題呀？」

阿客：「佢哋食食下飯摸手仔，唔止呀！同事影唔到咋！佢哋仲錫咗一啖！一時挨住，一時又攬住咁！」

OMG！咁樣有問題？唔知以為佢哋好緊火，做咗啲真係唔係幾啱場合做嘅嘢…… 呢一刻我想順便讚美下自己嘅表情管理，的確做得幾唔錯！

關公妹：「um，佢哋仲有冇做進一步嘅越軌行為呀？拍拖嚟食嘢，咁樣都唔算係好唔檢點啩！等我過去同佢哋吹兩嘴先！」

哦！原來咁啱撞正人哋結婚周年紀念！

關公妹：「佢哋話啲嘢好食，氣氛開心，我估可能因為咁高興，錫咗啖，攬咗下咁！咁樣仲可能可以幫你sell到情侶拍拖同周年紀念必到餐廳添喎！」

阿客聽完開心咗一秒，「咁都係嘅！拍拖慶祝，錫下都好似好平常呀可？不過都係有啲唔知點咁，始終喺餐廳咁多人……」

我笑笑口搵個藉口飄走左了，阿客清朝人嚟㗎？最後條片出咗反應好好，食完開心咪好囉，唔通人哋拍拖鬧交好咩？SLDPK（成龍打保錡）！

👩‍💼關公妹筆記💼

邀請KOL幫客戶宣傳，除咗俾錢，仲可以考慮sponsor產品或者服務，呢種合作方式對KOL出片或者出post嘅規限比較少，而且未必可以加減內容，所以事前一定要傾清傾楚，例如係有邊啲字眼需要提到，個coverage幾時之前要出等等，以免產生誤會。

更多KOL相關報導