話說有一日，幫阿客搞個簡單roadshow，擺好枱凳、駁好電、set好燈，等阿客驗收之後，電工師傅完成任務，就先行告退！我同promoter們就繼續set up，放好啲宣傳品，直到roadshow開始，見各樣嘢都進展得幾smooth，我就去放飯了！
啱啱坐低爬咗兩啖飯，阿客就打電話嚟，語氣好緊張：「唉吔死喇！我要移個電位呀，電工仲返唔返到嚟呀？」
關公妹：「電工？佢哋驗收完走哂㗎喇！」
阿客補多一句：「你知我唔會再有extra budget㗎啦！」
心諗，咁真係冇辦法喎！
關公妹：「好快！你俾10分鐘我，我10分鐘內返到嚟！睇下可以點搞！」
於是嗱嗱聲將碟飯倒哂入口，9秒9埋單行出餐廳返去我最深愛嘅客戶身邊！唔係講笑，我feel到阿客好心急，急到令我覺得佢同我係久別重逢，直頭想一擁我入懷咁款。
阿客：「妹你返嚟就好！點算呀？」
關公妹：「定啲嚟！你話我知你想移去邊先啦？」
阿客指住一個位，嗯…..目測其實係想將個拖板移右大概一米左右。
我心諗，乜咁樣都要叫電工咩？自己做都得啦！
嗰一刻，我望住個工具箱，行咗過去拎電線膠紙，然後起咗地下啲電線膠紙，將拖板移右咗一米，再貼番電線膠紙固定啲電線。
我一邊整，阿客就一邊問：「你有冇電工牌㗎？會唔會好危險呀？小心啲呀！好牙煙㗎妹！」
說時遲那時快，移位工程大概2分鐘就搞掂！係冇專業貼得咁靚嘅，但係都算交到功課啦！
老實講，真係正規電工要做嗰啲拆電制、駁線、拆個電制又加返條電線嗰啲我真係唔會亂咁試！一來唔識，二來唔敢攞條命嚟搏呀！但係，移個拖板嘅位置，係咪真係需要搵電工呀？
關公妹：「搞掂喇，睇下得唔得？」
阿客：「得呀！我就係要呢啲！多謝你呀！」
就係咁！呢個roadshow完咗之後，我得到左「無牌電工」嘅美譽！
關公妹筆記
作為公關，我嘅角色係解決客戶問題，無論係大事小事，幫到嘅會都幫，當然都要量力而為啦！叫我拆電制我真係睬佢都傻！後尾我諗諗下，會唔會阿客先係最聰明嗰個！完美演繹出「精人出口，笨人出手」，究竟佢真係覺得呢件事真係要電工做，定係佢唔想做，扮哂唔知想我幫佢做呢？
【Finance730 專欄作家：關公妹💛 @kwankungmui 】
關公妹，係一名從事公關工作嘅九十後，係一名每日都喺食物鏈最低層打滾嘅終極大打雜。PR唔係萬能，但偏偏好多人以為PR乜嘢都可以變到出嚟，於是就訓練出我今時今日過五關斬六將嘅身手去拆彈，就算紅都面晒，硬著頭皮都一樣頂硬上，各位敬請賜教！
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
