每年農曆新年，唔少企業都會搞新春宴會，會安排管理層同大家拜年派利是，公佈新一年嘅策略，希望記者朋友們幫手出多啲正面報道，出事嗰陣又可以高抬貴手。
之不過，有着數嘅地方，就會有「記者」嚟攞着數……
話說有次，阿客喺五星酒店搞新春宴會，向傳媒介紹最新嘅投資工具。
阿客一早已經點哂名想要XX日報嚟報道，叫我mark實呢位報咗名嘅XX日報財經記者A。
活動已經開始咗，點解記者A仲未到㗎 ？打俾佢又冇人聽， WhatsApp都冇人覆，當我好淆底佢no show之際，佢猶如漆黑中嘅螢火蟲飛咗入嚟！佢一嚟擺低卡片，就即刻投入狀態！
記者A：「呢個投資工具嘅回報率點樣計？會唔會對中小企投資者更加適用？」
阿客好開心咁答答答！記者A同阿客有來有往，一個答，一個追問，睇嚟對新投資工具好有興趣！成個氣氛都俾佢帶動咗，其他記者都開始發問。
我觀察到阿客喺同media傾緊嗰陣，望住我點頭微笑，似乎好滿意。
那邊廂嘅記者B就有啲搞笑，成場活動，佢只問過一個問題……
記者B：「唔該有冇豆瓣醬呀？」
然後一直低頭猛食，冇影過阿客嘅相，但就長期「相機食先」！我心諗，有冇咁好食呀？同時間個腦彈咗個問題出嚟，呢個會唔會就係嗰啲呃飲呃食嘅記者？
飯局完結，記者A繼續同阿客傾到火紅火熱，仲主動提議：「我哋可以安排個專訪，深入介紹呢個工具。」
佢仲話佢有個同事今日冇得嚟，問可唔可以幫手帶多份禮物返去。阿客聽完，梗係大方送多份啦。
當我諗住發達啦，實有功課交嘅時候，點知…… 出現咗峰迴路轉嘅發展。
記者A過咗兩日就交咗訪問問題過嚟，但一直拖住唔肯confirm專訪時間，拖拉咗兩個月之後，就借啲意話：「上頭唔批做呢個訪問。」連原本應承咗出嘅新聞稿都無影無蹤。
而記者B呢？佢竟然喺第二日就出咗一篇新聞稿，仲主動約做專題訪問。
呢件事令我有啲慚愧，覺得自己小人之心，順便搵公關朋友傾訴懺悔一下。
佢哋聽完即刻話：「你講緊記者A係咪成日蹭飯局嗰個假記者呀？佢以前喺XX日報做過，好似話操守問題俾人炒咗，而家成日扮記者去攞着數㗎！」
然後佢就Google 俾咗張相我睇，頂！真係佢！我知道自己中招了！
關公妹筆記
新年搞活動真係好矛盾，一邊又驚唔夠media嚟支持，一邊又驚假記者嚟白撞，冇coverage返俾客人開年，所以話公關真係同老母一樣，長憂九十九！
更多農曆新年相關報導
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
