譚仔早前終於公布私有化嘅消息。又再勾起輿論熱議譚仔難食咗，證明而家香港市道真係好差etc.，但對大股東嚟講，呢個可以話係絕佳時機（暫時）將譚仔據為己有。
譚仔2021年上市cap水近9億港紙，啲錢仲未用晒，公司截至2024年3月擁有13.5億現金。大股東日本東利多計劃用高於停牌前收市價七成半收購股份，睇落好闊佬咁，其實成單deal大股東只係需要拎5.56億港紙出嚟。香港連海外total 有218間店，每間店唔洗300萬，平過居屋單位，仲識繼續生金蛋。
留意返，譚仔難食咗都好，市道艱難都好，都係賺緊錢，仲要冇負債。就算大股東當初買譚仔用咗21億港紙，計下數其實breakeven嘅日子指日可待。最近港股有從睡火山中甦醒嘅跡象，而家再唔提出私有化，股價跟大市升先再收購，又貴咗架喇！如果能夠用呢個價錢將譚仔私有化，真係要恭喜佢。
譚仔（2217）私有化｜上市餐飲股被私有化的案例
私有化之後有咩plan，公司當然唔會話你知。商飛人搵到兩個上市餐廳再被私有化嘅case，或者可以帶來一啲啟示：
合興集團大刀闊斧削吉野家分店
喺中港兩地經營吉野家嘅合興（前香港上市編號：047），大股東2021年提出將公司業務私有化，私有化及疫情前，公司旗下內地吉野家及冰雪皇后同店銷售已放緩至近乎零增長，疫情令生意雪上加霜，2020年最後一份年報顯示，同店銷售增長按年大跌23%；雖然香港吉野家業務未有注入上市公司，但2020年部分分店被業主入稟追租，鬧到上法庭先被傳媒揭發欠租事件，內外受敵。
合興喺2020年正式私有化後，唔需要再向公眾報告業務updates，香港大刀闊斧將店舖洗牌，執咗近52間舖，而家都仲有60間左右；根據公司網頁，內地目前有830間門店，比起3年前多返250間左右，爭扎一輪算係大步檻過。
Zoe’s Kitchen 連名都冇埋
另一個係外國例子：地中海健康菜式聞名嘅美國小餐館Zoe’s Kitchen，起初只由家族都係經營餐廳嘅Zoë Proferis Cassimus於1995年創立，後來愈做愈大，分店數目由21間擴充至111間，最終喺2014年美國上市。不過上市之時，Zoe’s Kitchen已經喺增長放緩同高營運成本兩方面掙扎咗一段時間，收益屢次低於市場預期，股價增長亦大幅落後於同業。
最後，上市僅4年，公司就被同樣經營地中海餐廳嘅私人餐飲企業CAVA group收購， 當時CAVA group仲係私人企業，到2023年包埋Zoe’s Kitchen一齊上市，冇幾耐Zoe’s Kitchen連名都冇埋，變晒CAVA Restaurant。
聽完故仔，同樣由譚氏家族一手創立嘅譚仔，上市3年幾，雖然過去3年股價跌幅衰過大家樂（341）同大快活（052），但公司收入算係年年有增長，亦不至於好似香港吉野家咁冇錢交租。譚仔買家唔似CAVA主要經營CAVA品牌，而係行多品牌策略，所以將譚仔改名做Toridoll嘅機會唔大，因為冇乜協同效應。
近年譚仔積極擴展海外市場，到喺海外有返咁上下知名度，母企大可以將譚仔喺第二個地方再上市，又或者繼續留喺母企嘅懷抱幫公司賺錢，唔洗同其他散戶分利潤，反正留喺港股市場已經冇咩作為。
更多譚仔國際股票相關報導
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
