話說前排收到個call，「喂？我係邊邊個介紹㗎！我哋公司（國際品牌）嚟緊想搞個好玩啲嘅春茗，想睇下你哋幫唔幫到手！」
嘩！大品牌喎！一方面諗，有budget又可以做啲有趣嘢；另一方面又諗，究竟佢係嚟呃橋，定係真係會畀我哋做嘅呢？年中都試過唔少次嘔心瀝血做份proposal，轉個頭阿客copy哂成個idea，最後自己做……
Call咗一轉，阿客拋咗好多idea出嚟，例如係太空主題，想舞台背景係星空加流星，又想整個仿月球表面有軟墊嘅打卡位，影相之餘，仲可以體驗埋月球表面嘅硬度，仲癲到同我講想安排老細喺火箭造型嘅吊台登場。
一齊Brainstorm idea好開心，言談間我feel到佢哋都幾疊水㗎喎！我叫佢哋認真計一計嗰budget先，睇吓可以點玩法！
過咗兩日，阿客話：「係搵你哋做㗎啦！過兩日你約埋Production house一齊上嚟開會，我哋面對面傾啦！」
開會嗰日，我同Production house哥哥分享我哋過往做過啲乜嘢case，覺得ride on太空主題可以做到啲咩！仲做埋個plan，大概幾多錢，我哋就做到啲乜嘢畀阿客揀！
開會過程中，阿客都對我哋嘅構思讚口不絕，話呢個方案大氣，嗰個方案有創意。好啦咁我都入正題啦，「咁你哋嘅budget大概係幾多錢？」
阿客笑笑口好有信心：「我哋budget大概十萬左右，頭先嗰啲idea我都好鍾意，你哋睇下點做啦！」
咩話？十！萬！蚊！？
我同Production house哥哥四目交投，表情就如樹熊咬住塊葉咁，眼神交流咗一句：「唔係呀嘛？」
以尷尬而不失禮嘅微笑，認真問：「唔好意思，唔知我係咪聽錯，你係話十萬？定五十萬？」
阿客：「十萬！五十萬你想食咗我隻車咩？」
我哋內心OS：「十萬蚊頭先又講仿真月球表面佈置，又火箭出場，又司儀，又表演，又攝影，又剪片！Are you serious？」
最後，單生意當然冇接到啦！又係嗰啲老土嘢，指住自己個鼻話自己係大公司，同佢合作credential可以加佢logo，都係嗰句啦，Agency識光合作用咩？唔使食呀？真係多謝哂！
關公妹筆記
好多人都話搞event好麻煩，因為好濕碎，但係每一次我都好enjoy諗同實行啲idea，由零到有，將想法逐漸現實，嗰種成功感真係無法形容！雖然活動搞唔成，唯有儲定啲idea喺個腦度，希望下個客人會有大budget畀我天馬行空啦！
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
