人多嘅地方總係特別多突發嘢，就好似每次做親展覽，總會有人問「點解一定要買飛先俾入場？」，真係令人心很累！有次展覽就遇到一位好特別嘅朋友…
話說當日關公妹同一眾關氏兄弟姊妹睇緊個stage，突然收到helper急call，有人喺門口發爛渣。
一出到去，見到位男士指住我helper個鼻，勁大聲咁講「你真係未夠級數同我講嘢，叫啲話得事嘅出嚟見我！」
嚇死我啲helper寶寶咩！大學生出嚟打份part-time啫！
關公妹：「先生！我係負責人！請問有咩幫到你呢？」
呢位先生一秒變臉用返平靜，細細聲（幾乎喺我耳邊）同我講，「你就係負責人？我有件好重要嘅事同你講！」
呢位先生帶住銀色金屬框眼鏡，身穿自信藍中山裝外套，講嘢卷脷略帶r音，下稱漆哥。
漆哥細細聲但眼神就好凌厲：「地球真係好危險！呢個展場周圍都裝晒偷聽器！」
其實呢個年代電話先係竊聽專家，如果唔係啲廣告點會咁知我心意…不過先生你都唔好咁啦，stage嗰邊等緊我㗎！
關公妹：「先生！多謝你嘅資訊，我會同場地了解下！」諗住快手安撫完佢就返入場繼續忙。
漆哥好緊張：「你要信我，我喺門口研究咗好耐！我部探測器探測得一清二楚！」
咦，你部「探測器」咪就係iPod touch？好彩我年紀有返咁上下，有見過！
漆哥：「你唔好睇小我部探測器，表面上佢係一個探測器，實際上佢一個測謊機！我而家就問你幾條問題！」
明明表面上佢係一個iPod touch…
漆哥繼續：「你信唔信呢個探測器係我發明？」
冇諗過現實世界入面，會遇到港產凌凌漆！天啊！場入面好多嘢做，快啲放返我入去啦！心急人上！
關公妹：「信呀！你好叻呀！你一定研究咗好耐㗎喇！」 (PR mode on)
漆哥：「你真係信我呀？」
關公妹：「信呀！(堅定眼神) 好人好者無啦啦做乜呃我喎！」
漆哥好開心！佢話唔需要用測謊機都知道我講嘅係真話！
關公妹：「真係好開心見到你呀，但係而家老細急call我入去做嘢，再唔入返去就好麻煩！你加油呀！」
漆哥又真係咁順攤放我走冇再嘈，亦都冇再煩helper寶寶。之後聽返helper講原來漆哥嗰幾日展覧都有拎住「探測器」喺門口徘徊，不過冇大吵大鬧，唔影響其他人就唔緊要啦。活動發生嘅怪事，有時真係「講都冇人信」呀！
關公妹筆記
喺活動入面吵鬧嘅人多數有有兩種，一種就係想攞着數，另一種就係好悶，想搵人傾偈，希望得到尊重同埋認同。
總結我多年嘅經驗，無論面對邊種人，首先都係盡量令對方情緒平復，避免用「你冷靜啲先！」，可以改用「我哋慢慢傾下」。對住攞着數嘅人保持禮貌，唔好亂開先例，注意講嘢嘅字眼回覆，就算佢要投訴你都係跟足程序。而面對想搵人傾偈嘅人士，聽聽佢講嘢，搵啲位讚下佢，表示認同，再拉開話題，情緒平復返就會好似冇事發生過一樣，萬試萬靈。
【Finance730 專欄作家：關公妹💛 @kwankungmui 】
關公妹，係一名從事公關工作嘅九十後，係一名每日都喺食物鏈最低層打滾嘅終極大打雜。PR唔係萬能，但偏偏好多人以為PR乜嘢都可以變到出嚟，於是就訓練出我今時今日過五關斬六將嘅身手去拆彈，就算紅都面晒，硬著頭皮都一樣頂硬上，各位敬請賜教！
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
