今時今日，仲會有PR因為報紙報導出得靚而感動嗎？我可以話畀你聽——會！
今日打開報紙，嘩！係大半版，圖文並茂，個報導真係好靚仔呀！雖然而家啲報紙份量愈嚟愈薄，阿客又唔會特登要求要有print，但當你真係攞住份報紙，聞住啲油墨味，見到篇稿出得咁靚！作為一個PR，內心真係會有一種難以言喻的滿足。
一邊感動緊，一邊whatsapp張圖畀客：「有份報導今日出咗報紙！」
阿客：「妹，點解報導冇出網站條link㗎？」
吓？你而家手上拎住份紙，搵部電話或者電腦逐隻字逐隻字咁樣打個網址都嫌麻煩啦！如果要出，都應該出QR code？但問題係，我哋又唔係落廣告，邊有得畀你話事呀，你話落就落咩咩？
關公妹：「係呀，其實出報紙出到link好罕見㗎！始終唔係咁唔方便讀者！」
阿客：「咁點解唔方便？」
關公妹：「因為睇完個報導又有興趣嘅話，正常會直接打個公司名search，會快過打個網址。同埋editorial報導出咩、點出，都唔係我哋控制到嘅。」
阿客：「哦…明白…咁我又唔明喇！點解真係冇link呢？」
吓？又問？正當我陷入迷思諗緊要點同阿客解話嘅時候，靈光一閃，呢一招叫做「以其人之道，還治其人之身」，錄音機模式ON！
關公妹：「係呀！Media唔會出㗎！」
阿客又問：「咁點解報紙冇出到website條link？」
關公妹：「係呀！Media唔會出㗎！」
阿客再問：「點解個報導冇出到website條link？」
關公妹：「係呀！Media真係唔會出㗎！」
阿客仲問：「點解個報導冇出到website條link？」
關公妹：「係呀！Media真係唔會出㗎！」
最後，阿客語氣一轉：「哦，Media真係唔會出㗎？」
關公妹：「係呀！Media真係唔會出㗎！」
呢招最終成功！終於明白堅持就會成功嘅大道理！
關公妹筆記
做PR好多嘢都冇得控制，只要篇嘢唔係廣告，幾時出、出邊段、出唔出公司名、有冇link，全部都唔係你話事。有時覺得，啲客問問題，其實唔係真係想知道個答案，佢只係想知仲有冇得要多啲。咁我哋可以做嘅，就係好清楚咁答，答到佢明白：「真係冇嘢可以改變到」就好了！
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
