美國店鋪盜竊問題嚴重，當地商家被迫使出渾身解數對抗盜賊，例如有店主將舖頭入面嘅平價商品全部鎖入玻璃櫃；亦有商家另闢蹊徑，喺店內嘅自助付款機旁邊安裝咗一面鏡子，希望可以喚醒小偷嘅自我意識，令佢哋及時收手。
對盜賊嚟講，採用自助結帳嘅商店基本上係「無掩雞籠」。英國萊斯特大學名譽教授Adrian Beck曾經指出：「如果你嘅零售商店有50%嘅交易係通過自助付款系統結帳，咁舖頭嘅損失將會比平均值高出77%。」
為咗「填補」自助付款機嘅保安漏洞，部分商家開始喺自助付款機隔籬安裝一面鏡子，希望小偷喺照鏡睇到自己嘅倒影時會感到內疚，並打消犯案嘅念頭。
呢項措施雖然聽落有啲雞肋，但多項心理學研究都顯示，人喺鏡中見到自己嘅倒影時，做壞事嘅可能性會大幅降低。
1976年嘅一項研究發現，當人們身處一個自我意識增強嘅環境（例如照鏡或者聽到自己把聲），佢哋會冇咁容易作出偷竊、作弊等違反社會規範嘅行為。其他研究同樣指出，鏡子嘅存在可以令人仔細觀察自己，從而更有可能以正直嘅方式行事。
不過唔好將呢塊鏡想像到好似魔鏡咁犀利，畢竟有份參與研究嘅學者都承認，佢哋暫時仲未完全了解自我意識係如何左右人嘅行為；Adrian Beck及其他專家亦認為，安裝鏡子嘅作用未必有其他人想像中咁神奇。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
