世界上應該冇老闆樂意見到自己舖頭被盜竊，但巴黎一間運動用品店為咗增加品牌曝光度就反其道而行，鼓勵大家入舖頭偷嘢，只要小偷跑得贏保安就可以將賊贓帶返屋企。不過留意返，個保安其實只係替更㗎咋，因為佢正職係一位短跑運動員！
法國跑步用品零售店Distance喺上個月13日舉辦咗一場「引狼入室」嘅宣傳活動，店內部分商品被貼上「Rob it to get it」嘅標籤，講明當日只要顧客跑得贏佢哋個保安，就可以無條件將商品帶走。
Distance搵返嚟嘅當然唔係等閒之輩，呢日負責攔截小偷嘅臨時保安，曾經喺100米短跑賽事中跑出9.99秒成績嘅職業運動員Meba-Mickael Zeze，29歲嘅佢最近兩屆奧運會都有代表法國出戰男子4×100米接力賽。
明知跑就應該好難跑得贏職業選手，所以有扒手嘗試另闢蹊徑、組隊犯案，一邊搵人分散Zeze嘅注意力，一邊拎住商品衝出舖頭，不過就算Zeze遲咗起步，都仍然可以輕鬆攔截小偷。《華盛頓郵報》報導，Zeze甚至未有機會出盡全力，佢捉賊時嘅衝刺速度僅僅係佢最高速度嘅35%。
埋單計數，當日有74名小偷喺店家嘅鼓勵下犯案，其中有72人成為咗Zeze嘅手下敗將；而得逞嘅兩名小偷因為咁啱喺交通燈轉燈前衝過路口，所以成功逃脫Zeze嘅追捕，名正言順咁帶走咗賊贓。
雖然損失咗兩件商品咁大把，但呢場宣傳活動成功喺網上引起迴響，品牌創辦人Guillaume Pontier都鬆一口氣：「多謝Zeze，好開心佢跑得夠快，如果唔係呢場活動會變成財政上嘅噩夢。」
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
