專欄｜禾稈要冚實珍珠（關公妹）

話說，最近阿客推出個新menu，由於呢間餐廳好少有優惠，連自問平時好慳家嘅我，都覺得真係要去食喎！所以好有信心，今次嘅反應一定會好好！

又有新主題菜單，又有半價優惠，仲每人送隻兩隻生蠔添！最重要係今次啲相仲影得好靚仔，media coverage方面真係0擔心，好有信心今次會做到每個客都要求嘅「鋪天蓋地」！

收齊料嗱嗱聲砌好份新聞稿，等埋阿客comment同approve就可以出街了！

就喺呢個時候，阿客覆我喇！

阿客：「阿妹呀！唔得呀！覺得要改呀！寫得太吸引啦！」

吓？我有冇聽錯？我試過畀客人要求我寫個意粉寫得性感啲！寫個甜品寫得跳啲！但係因為寫得太吸引要改，真係聞所未聞。

阿客：「想再簡短啲！如果唔寫我哋半價，只寫每人都會送生蠔好唔好呀？」

關公妹：「吓？點解呀？你會抽起呢個咁靚嘅offer？」

阿客：「唔係呀！我哋會做㗎！之但係呢，想低調啲咁！」

關公妹：「係咪有咩concern？我哋傾下睇下點拆吖！」

阿客：「其實咁嘅……我哋係想要多啲生意，但又唔想話太多，我知我哋啲嘢食同offer係正嘅，但禾稈梗係要冚住珍珠㗎嘛！」

黑人問號？既然「禾稈要冚住珍珠」，點解你又要搵我呢個珍珠擸人夾promotion呀？

阿客：「我哋只係想多少少生意，真係唔使太多㗎！係咁易推下得！冇壓力！出稿得㗎啦！唔使叫咁多記者嚟拍！」

嘩！唔通個天都知我攰，想益下我？最後我費盡唇舌，先成功爭取將個優惠寫喺內文（一句）同放caption，即係好細隻字個啲！

最估唔到嘅係，阿客真係冇乜問過我有咩media update，覺得好古怪，後尾發現，原來佢哋純粹聽朋友講同介紹，話做下PR promotion好啲就試下！媽呀，可唔可以多啲呢啲客？

關公妹筆記

做media pitching有時都真係好講運，有時啲內容太雞，就算同你media關係好，就算你好努力，都會徒勞無功；如果隻job有吸引嘅餡，就算你唔call，media都會自動搵你。今次啲內容夠，但又唔畀大力推，有一種暴斂天物嘅感覺。

試過有壇好普通嘅嘢，有記者真係幫我攝咗一兩句加張相！當然阿客未必會欣賞啲咁細嘅coverage，但都真係好感動。

今次阿客唔要求鋪天蓋地，壓力指數大減！但嗰餐真心吸引，唯有希望media手下留情，唔好大肆報道啦！