「嘩，劉經理，今日咁早到呀？」一見到劉經理入門口，我即刻問。
上年嘅一個Happy Friday Night，我同一班同行、律師約咗出嚟，食下飯玩下poker。次次約出嚟，劉經理總係最遲到。冇計，佢熱愛工作，星期五都OT到九點幾先肯走。但係，嗰日佢一反常態，七點幾已經到，在座各位無不驚訝。
「頂，俾新同事嚇走呀我。」劉經理一臉愁容咁話。
「吓，發生咩事？」大家非常好奇。仲記得三個月前，劉經理先話公司請咗一位Analyst，二十四歲女，青春有活力。由於人手不足，新同事嚟到冇耐，仲會跟佢做一隻IPO，一齊出business trip，令佢相當興奮。短短三個月，佢嘅態度竟然可以咁大出入？
「首先，我畀一畀佢張相你睇先。」劉經理打開手機，拎咗新同事張相出嚟——係一位目測八十公斤嘅女士。
「嘩，我X，咁X肥嘅？」一位朋友話。
「咪就係，我老細interview嗰陣一早知佢唔係靚女，仲扮好人送佢陪我出trip，我真係俾佢激死。」劉經理嬲爆爆咁話。
「咁公道講句，佢唔靚女姐，又冇做錯咩，點嚇走你呀？」我問。
「妖，佢色誘——唔係！佢性騷擾我！」劉經理怒火中燒咁話。
「哈哈哈哈哈哈哈哈哈哈哈哈哈哈！」現場所有人得個笑字，完全冇人關心劉經理。
「咁大鑊呀？快啲講嚟聽下。」大家笑住問。
「唉，估到你班友仔會笑X我。」劉經理開始娓娓道來⋯⋯
一個月前，劉經理同新同事Vivian出trip，本身佢都冇咩所謂，諗住Vivian肥姐，最多咪坐車嗰陣逼啲，後來先知中伏。去酒店check in，職員畀咗一人一間房佢地，Vivian問：「吓？原來我地分房㗎？」劉經理已經嚇親：「吓，緊係分房啦，公司唔會咁冇人性，為咗慳嗰少少錢，要同事同房嘅。」Vivian個樣有啲失望，令劉經理心感不妙。
見完客，返去酒店休息，劉經理一路沖涼都聽到有門鈴聲，不過冇出去應門。直到沖完涼，佢先知啱啱邊個搵佢，因為佢收到Vivian嘅訊息：「啱啱搵你冇人應門，沖緊涼？做咩唔等埋我先？」下面仲附送咗佢嘅出浴自拍，得一條浴巾圍住全身，十級驚嚇。劉經理一時嚇到出唔到聲，冷靜咗一陣，先覆佢：「Mind your language.」就唔再覆佢，直接瞓教。
之後嗰幾日，劉經理以為Vivian會好尷尬，識做行開啲，點知完全冇，依然各種色誘，挨身挨勢、挑逗說話、著住性感衫拍門，通通都有。劉經理只好刻意保持距離，直到返香港。
就係咁，劉經理驚咗Vivian，而家日日早收工，減少同Vivian共處一室嘅機會，避開性騷擾。
「吓？咁大件事，你又有晒證據，唔去HR告佢sexual harassment？」我問。
「唉，我地呢啲細行，成間公司計埋茶水阿姐，得嗰十二個人，邊有呢啲機制呀？況且，我同你地講，你地第一下都笑我啦，我同老細講，佢分分鐘笑埋一份，以後叫Vivian跟我，我仲大鑊呀。算數啦⋯⋯」喺呢一道要說明返少少，大家唔好以為得Morgan Stanley、BNP Paribas呢啲大行，先可以幫公司搞上市。其實有唔少細行，只要佢地有牌，亦可以做IPO，工作內容相似，純粹規模細好多，一間公司可能得十二三人。所以，劉經理間公司得十二個人，係好正常嘅事。
好啦，講返轉頭，估唔到，作為一位男性，不幸地成為性騷擾嘅受害者，亦會選擇息事寧人。
「唉，咁又係，女人俾人性騷擾，好多人會同情佢，但男人俾人性騷擾，個個聽到只會笑，即使相信真有其事，都未必會認真處理，覺得你冇蝕底呀嘛。」其中一位朋友嘅說話，悲哀而真實。
就係咁，冇人幫到劉經理，佢只可以死忍。
好彩，半年後，Vivian自願離職。原來，佢唔止性騷擾劉經理一個，仲大膽到客人嘅財政總監都搞埋，搞到客人投訴，老細即刻高度關注，叫佢自己遞信，另謀出路。
就係咁，劉經理終於擺脫呢一個惡夢，可以自由自在地OT啦。而Vivian？聽講佢搵到一份新工，係一間新成立嘅細行，至於仲有冇性騷擾人，劉經理唔知，亦唔想知，哈哈。
（純屬創作、如有雷同，實屬不幸）
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼消閒生活 時尚品味
▼投資教室 專題研究
