大學畢業後，大家紛紛踏入社會工作。Rebecca入到一間中資投行做IBD，生活忙碌而奢侈。
睇一睇Rebecca嘅Instagram，就知佢十分富貴。佢嘅全身照，總有一個名牌手袋跟身，Chanel Classic Flap、Gucci GG Marmont、LV Neverfull GM——乜款都有。佢嘅自拍，展示咗唔少飾物，Cartier 手鈪、Van Cleef & Arpels頸鏈、Bvlgari戒指。佢嘅打卡活動，全部價值不菲，出入Country Club、食omakase、去日本滑雪，認真開心。
Rebecca嘅行徑早已引起討論，有人話佢太港女，又有人質疑佢俾人包，不過冇人正面批評過佢。早排大學聚會，一班人去party room玩，就出事了。
去到party room，Rebecca十分嫌棄：「唉，好心唔好再去party room啦，又細又污糟，我同事係Carlyle & Co.嘅member，下次我叫佢幫手book房一齊食飯仲好啦。」
「嘩，嗰道食餐飯都要成千蚊，邊有錢呀？你估我地好似你咁，做ibank咁有錢咩。」有人暗寸。
「千幾蚊你唔係畀唔起呀？」Rebecca回敬。
搞手Angel打圓場：「唔緊要啦，下次試下其他地方，我再plan下啦。」
「都係Angel最體貼，」Rebecca話：「係喎，早排你生日喎，生日快樂！點慶祝呀？」
「多謝。冇呀，去下staycation咁啦。」Angel望一望男朋友Ben，簡單回應。
「邊間酒店呀？」Rebecca問得十分詳細。
「帝苑呀⋯⋯」Angel緊張起嚟，擔心畀咗位Rebecca入，攻擊Ben。
不出佢所料，Rebecca即時鬧Ben：「搞錯呀你，女朋友生日去帝苑？至少去Ritz-Carlton啦。」
Ben一向睇Rebecca唔順眼，亦冇Angel咁和平，聽到Rebecca寸佢，亦不甘示弱：「邊個好似你咁威呀Ca姐，成日黐人去private club，又打晒卡咁。我地好腳踏實地㗎。」
現場冇人出聲，個個食住花生睇好戲。
「講咩呀你？我有返工㗎，我唔腳踏實地咩？」
「收皮啦，全行都知你間行出手低，IBD得三萬一個月咋。你啲袋呀，一個月糧都唔夠買啦。成日買名牌裝身，好腳踏實地？」
「我買袋關你乜事呀？我做呢一行成日見客，冇一兩個袋點得呀？好心你見識多啲啦。」
「咪X扮嘢啦，見乜X嘢客呀。你做analyst嘅，咪又係長期坐printer寫書，一年嗰一兩次listing dinner，使乜咁多袋呀？」
「買袋係我嘅興趣，我點買、為咩而買又關你乜事？你唔好以為自己入到美資做trader好巴閉，狗眼看人低！」
「咁我同女朋友慶祝生日又關你乜事呀？老老實實，著到成身名牌有X用，你咁得閒買Hermès手鈪配貨，不如減下肥啦，我見到隻鈪扣住你啲肉，真係好辛苦呀。」呢一秒，現場人士真係忍唔住，個個爆笑。
「XX啦你！」Rebecca嬲到爆，拎起佢個YSL Niki奪門而出。
呢一場罵戰，成為一時佳話，個個話Ben有料，大挫Rebecca銳氣。此後， Rebecca冇乜再post Instagram炫耀了。
唔使問我Rebecca係邊個，一直以來，我聽過唔少堆砌美好生活嘅人，佢只係其中一個。以上故事只係一個例子，畀我分享看法。Ben嘅言論過激，但我好認同佢嗰句：「著到成身名牌有X用。」如果人地真心在意你嘅生活，只要起下底，睇你住邊、返咩工，就知你係真實富貴，定充大頭鬼，你買幾多袋都冇用。假如想人地欣賞你，提升自己，永遠係最佳方法。
（如有雷同，實屬不幸）
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼消閒生活 時尚品味
▼投資教室 專題研究
