去年夏天，Esther成功入到一間歐資投行，作為Summer Analyst實習。話就話實習，實情係一場選拔。短短兩個月內，公司會喺多名實習生之中，篩選一部分出嚟，給予return offer，等佢地畢業後，正式入職做Graduate Analyst。因此，實習生之間可謂亦敵亦友，既要一齊合作做projects，又要互相較量，爭取表現拎return offer。
Esther明白實習係一場競賽，未必腥風血雨，但少不免龍爭虎鬥，所以佢一直如履薄冰，謹慎行事。上司話happy hour一定去，以免錯過咩消息，或者俾人講你壞話；同事叫你做嘢，請求佢地用電郵通知，白紙黑字冇得拗；其他實習生話幫你手，盡量婉拒，自己做返，以免有錯又唔怪得邊個。兩個月以來，Esther十分小心，盡力做好本分，唔會畀位人地入。
去到實習後期，佢自問表現唔錯，同其他實習生相處和睦，開始鬆懈。好死唔死，佢要出席一個面試，迫於無奈之下，請咗一日假。
「得啦放心，嗰日有咩我會cover你㗎啦。」另一位實習生Cathy話。
就係咁，Esther相信咗Cathy，放心去面試。佢真係估唔到，差啲俾人跣佢一鑊。
當日面試完，Esther依然唔放心，remote log in公司電腦，八卦下狀況如何。原本Esther有一項任務，每日上Bloomberg，將一啲資訊整理，再放入Excel做紀錄。而Cathy答應咗，會代佢完成呢一項任務。
「睇下今日有咩料先。」Esther打開個Excel：「X你XX——」
今日完全冇更新過。
Esther嚇親，即刻上Bloomberg，自己更新個Excel。嘩，嗰日仲要特別多料呀陰公。
第二日早會，上司問起市場資訊，Esther答得十分流暢，佢見到Cathy明顯有少少驚訝。開完會，Esther即刻捉住Cathy問：「你又話會cover我啲task？點解個Excel冇更新過㗎？」
「吓？咩Excel呀？」Cathy扮傻。
「Market news個Excel呀。」Esther嬲嬲哋。
「吓，唔知喎。」
「唔知？明明email白紙黑字寫明，呢一個task係分配畀你做，你要負責㗎！」
「唉，咁忙，邊有時間搞呀？」Cathy明顯玩嘢。
「咁你又答應我？每日早會我要靠呢一個Excel先報告到market news，如果琴晚我冇更新，今日一定準備唔切，早會唔知答乜好！」
「吓，我點知咁多喎。」Cathy繼續做無賴。Esther見到Cathy咁，知道佢係有心跣自己一鑊，鬧佢只係嘥氣，直接走人。
《孫子兵法．始計篇》：「攻其無備，出其不意。」實習只剩一星期，Esther開始放鬆，Cathy正正把握呢一個機會，跣佢一鑊。如果當晚Esther冇開機八卦下，已經出咗事啦。好彩，佢仲有少少謹慎之心。
最後，Esther得到return offer。由於佢搵到一份更好嘅工作，佢冇要到。但係，佢唔會忘記實習學會嘅道理——投資銀行極黑暗，防人之心不可無。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼消閒生活 時尚品味
▼投資教室 專題研究
