以背景而言，Grace係一個平凡嘅人，一般本地大學畢業，喺銀行做back office，家住居屋，唔係咩大富大貴。以外表而言，佢係一個天生麗質嘅人，擁有標致嘅臉孔、修長嘅身材、幼嫩嘅肌膚，令佢得到唔少男士嘅追求。
最令Grace自豪嘅，唔係佢嘅外表，而係佢嘅男朋友Ivan。一次酒吧暢飲，令佢識到Ivan，二人相談甚歡，冇耐就一齊咗。Ivan唔止高大靚仔，又喺美資銀行做DCM，月薪十多萬，見識亦不少，對Grace而言，簡直係白馬王子。
但係，現實唔係童話故事，總有不完美嘅地方。一開始拍拖，Ivan同Grace沉醉在熱戀之中，任何事情可以不拘小節，互相包容。時間長咗，因為二人嘅背景有距離，多咗不滿同爭執。Ivan會嫌棄Grace嘅工作普通，出唔到大場面，叫佢搵過份新工；又會話佢間大學冇人識，問佢使唔使去外國讀個master洗底；甚至會表明唔帶佢見朋友，費時太失禮。
「一開始你已經知我唔係三大畢業，又返緊back office㗎啦，做咩而家咁多要求？」Grace開始忍受唔到。
「小姐呀，人要進步㗎嘛。你成日話好自豪自己男朋友係ibanker，你係咪應該拎返ibanker女朋友嘅質素出嚟呢？」
每次講到呢一道，Grace就唔敢出聲，言聽計從。佢認為以自己嘅背景，可以高攀Ivan，成為ibanker女朋友，已經十分幸運。如果再埋怨甚麼，只會失去呢一位筍盤。
為咗男朋友而進步自己，本質上係一件好事。只要Ivan尊重Grace，唔畀太大壓力佢，而Grace又做出成績，其實雙方都有收穫，所以Grace有努力進步。
但係，為咗男朋友而委屈自己，又未必係一件好事。
拍拖不足一年，Ivan就出軌，仲要俾Grace捉到。Grace大發雷霆，喊咗好耐。一開始，Ivan有認錯，請求Grace原諒，但係，當Grace冇理佢兩日、三日，佢已經失去耐性，冇乜再搵Grace。Grace感覺到危機，又唔想失去呢一段關係，就原諒咗佢。
唔知係咪Ivan睇死Grace唔想冇咗佢呢一個筍盤，唔敢分手，後來佢更加猖狂，出軌出到唔怕畀Grace知。面對伴侶拈花惹草，Grace又真係默默忍受。
可惜，後來Ivan都係提出咗分手。Grace好傷心，多次挽留亦冇用。其實Grace深知，Ivan只係鍾意佢靚，而唔鍾意佢嘅背景。當Ivan搵到一個好似佢咁靚，仲要背景好好嘅人，就會同佢分手。而以Ivan嘅條件，真係好容易
Grace始終逃避唔到分手。不過，我認為係一個解脫。
男朋友係ibanker，可能令你好自豪，亦增加你進步嘅動力。但係，如果佢恃住呢一個身份，認為同你拍拖係紆尊降貴，冇尊重過你，甚至出軌，咁係ibank MD都冇用，因為佢冇愛護你。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
