周杰倫演唱會最後3日，琴晚就連港版「周董」（周大福董事）、新世界主席鄭志剛都現身捧場，仲獲本尊認證邀請合唱名曲「說好的幸福呢」。不過望返場外，中環海傍則遍地野餐、包船直播，甚至爬牆硬闖嘅Fans，扭盡六壬只為聽到台灣天王「一首歌的時間」。
你可能覺得Fans誇張，但唔係人人都好似鄭志剛咁幸運。要成為場內觀眾，原來真係殊不容易——一係有心，一係有金。
To 炒 or not to 炒？真心Fans蝕通脹棄利潤 只為聽一闕歌
觀眾有心，因為要等足周董3年半，經歷5次改期先等到開騷。有傳主辦方已打算申請健力士紀錄，記念呢場「世上最多人等嘅一場演唱會」。假設歌迷由2019年買飛，手持票尾一直「坐艇」，分分鐘倒輸埋13%通脹。開騷前夕，仲要抵抗誘惑，果斷拒絕高達7倍利潤嘅炒價！
觀眾有金，因為搶唔到飛就要付出比原價高至少2倍、最多7倍，甚至過萬嘅黃牛價，先可以買到一紙門票。
3年票尾，最後3日，一場對歌迷嘅殘酷考驗：到底千金買唔買得起3年嘅真心？
出海包船睇show或成新常態？
每晚周董開騷，維港仲會出現一個奇怪景象，十數隻遊艇7點15分準時駛向海中心，3個鐘後1又突然四散。原來，由於中環海濱舉辦嘅演唱會聲量響徹維港，唔少買唔到飛嘅歌迷索性隔岸聽歌，搵遊艇公司包船出海。喺網上買賣平台Carousell，亦有公司推廣呢項「海上睇騷」服務，每位收費$630，同最平、原價$580嘅門票差唔多，但就需要18人以上先成團。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
