網購呢個概念嘅出現顛覆咗零售行業嘅生態，亦改變咗唔少人嘅生活習慣。根據Forbes嘅報導，而家有20.8%嘅零售生意都係喺網上進行嘅，呢個數字可能仲會喺3年內增加至24%。
咁如果想喺網購行業尋找商機，又可唔可行呢？唔係唔得嘅，但一定要搵啱自己嘅定位，諗清楚自己要賣咩產品先。如果係賣成本高、單價低同利潤少嘅產品，分分鐘搞完一大輪都賺唔到太多錢，咁仲不如繼續做一個虔誠嘅黎生，準時返工、準時出糧好過啦。
美國知名財經雜誌Insider Monkey整合咗Forbes同Polymer Search嘅研究資料，列出20種網上零售利潤率最高嘅商品。如果你已經對社畜嘅生活感到厭倦，想試下自己開間網店做生意，咁就不如先參考下Insider Monkey嘅資料，再決定自己要賣咩啦！
第5位：汽車罩🚩平均利潤率：68%
汽車對部分車主嚟講，唔單止係代步嘅工具，仲係最重要嘅心肝寶貝。自己日曬雨淋都唔緊要，但架車一定要靚靚仔仔！由於近年買車、揸車嘅人多咗，汽車配件需求持續增加，預計市場規模會由2022年嘅4422.1億美元增長至2030年嘅7209.2億美元。汽車罩就係其中一樣最受歡迎嘅汽車配件，始終架車keep得好，貶值都冇咁快嘛！
第4位：無線耳機🚩平均利潤率：76%
做gym要聽歌，返工搭車要聽歌，鍾意聽歌嘅人就更加要聽歌！無線耳機憑住卓越嘅音質同便利性，俘虜咗一眾消費者嘅心。預計未來幾年，無線耳機嘅市場會因為技術嘅提升、消費者嘅偏好，以及大眾對便攜式耳機嘅需求上升而持續擴大。
第3位：手錶配件🚩平均利潤率：80%
雖然而家望下手機就睇到時間，手錶已經唔再係必需品，但都唔好睇小手錶行業嘅潛力，始終仲有智能手錶呢個market。手錶產品預期會喺2023年產生757.5億美元嘅收入，非奢侈品預計將會佔手錶市場銷售額嘅60%。隨住錶帶、錶殼等產品嘅需求不斷增加，大家可能會喺呢個市場發掘到高利潤嘅商機。
第2位：數碼藝術🚩平均利潤率：90%
藝術呢家嘢非常主觀，亦唔係個個都識得欣賞，不過都無阻數碼藝術作品市場快速擴張。線上銷售平台嘅出現，令數碼藝術家可以接觸到更多受眾，消費者亦有機會買到高質量而且價格實惠嘅數字藝術作品，令數字藝術行業嘅預期增長同利潤變得更可觀。
第1位：植物🚩平均利潤率：95%
你冇睇錯，植物真係利潤最高嘅商品。大眾對室內同室外植物嘅需求不斷增加，但下下揸車出去買花買草實在係太麻煩啦，所以消費者開始用網上購物嘅方式去滿足佢哋嘅園藝需求。The Express Wire仲估計，線上植物市場嘅規模會喺2023年前實現12.15%嘅增長。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢 Facebook
▼投資教室 專題研究 YouTube
▼消閒生活 時尚品味 Instagram
