「嚟緊公司要有七成人work from home，我地team留兩個喺office就得，大家意下如何？」疫情期間，阿姐問起同事work from home事宜。
「我已經病咗，要work from home呀。」
「我要留喺屋企湊女，緊係work from home好。」
「嗱，我問咗老細㗎啦，佢畀我work from home。」
每一位同事以唔同理由，爭取唔返office。
「我緊係想work from home⋯⋯不過⋯⋯要我返office都可以嘅⋯⋯」Jess自知人微言輕，實俾人捉佢返office，不情願地講。
「阿姐，每日返office我可以呀！」Betty嘅回答，令Jess甚為驚訝。
「好啦，下星期一開始Jess同Betty返office，其他人work from home，直至另行通知。」
【林子晞筆下的投資銀行家百態】
Bobby的小機心 – 做義工做到變萬事通
投行少爺仔初嚐商務旅行「咪對出差有期待」
頂級Ibank低薪奴工位費力勞心 Fresh Grad照爭崩頭有理由
啪——Jess無奈地掟低headset，出去pantry唞啖氣。作為全team最junior嘅佢，一早估到work from home冇自己份，但佢依然唔開心。
「唉，都估到係我地兩個㗎啦。」Betty得戚咁行入pantry：「嗰班人咁自私，仲唔逼我地兩個返office，自己喺屋企䟴䟴腳咩。」
「明明你想work from home，點解啱啱又話可以返office？」Jess無奈地問。
「明知冇可能，爭取嚟做乜？」Betty一副理所當然嘅表情。
車⋯⋯咁你都唔使扮到咁樂意呀？搞到我好似好懶咁⋯⋯Jess心諗。
一直以嚟，Jess好不滿Betty做爛巿，影響到自己。份內事大家會做，但Betty一定做多。老細想要一份report，講明每人負責一兩頁就得，Betty做足十八頁，其他人交得一兩頁，顯得非常尷尬。份外事大家唔想做，佢亦衝去做，隔離team同事放假，佢主動同老細講可以幫手，拎咗一大堆工作返嚟，分畀自己team，搞到大家一齊OT咗兩個星期，其他人仲要承受心理壓力，好似當初冇開口話幫手，顯得唔夠積極咁。
今次work from home安排又係咁，明明Betty成日同Jess講，自己住大西北，唔想返office，Jess以為Betty會向老細表達真實意願，或者可以爭取全team輪住返，點知Betty完全冇，仲扮到好樂意返咁，令Jess唔敢再講咩。
做一個乖巧嘅員工係咪好？我認為有一個程度之分。如果係合理乖巧，做好份內事，有能力先去幫手，又影響唔到人，呢啲係盡責、積極。如果係過份乖巧，份內事未搞得掂，就去掂份外事，仲累埋同事，呢啲係做爛市。
而做爛巿，未必係好事。
後來，喺疫情最嚴重時，公司改為全員work from home，而Jess嘅部門只需要留一位同事每日返office收信，再scan畀同事就得。Well，Betty講到自己日日返都得，阿姐緊係將呢一個重任交畀佢。之後三個月，成個部門得Betty一個要返office，仲要負責scan晒所有文件，真係唔好彩。
「哈哈，佢真係求仁得仁啦。」Jess苦笑。
【Finance730 專欄作家：林子晞 @hkibankmemes 】
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢 Facebook
▼投資教室 專題研究 YouTube
▼消閒生活 時尚品味 Instagram
