早排國泰航空一個空姐因為被指歧視唔識英文同廣東話嘅乘客，被乘客放上小紅書公審，搞到國泰最後要出嚟公開道歉（三次）兼炒涉事空姐平息同胞怒火。前兩日就輪到中華航空發生類似嘅語言衝突事件，一個日籍女乘客因為空姐同佢講中文而被焫著，但今次個乘客冇上小紅書控訴空姐，而係選擇當場爆發，點知最後被航空公司趕咗落機。
台灣中華航空星期日（4日）一班CI111航班早上由日本福岡飛往台北桃園，但一名日籍女子因為不滿空姐用中文同佢溝通，於是情緒失控破口大罵，話嗰度係日本，空姐應該講日文。華航後來證實，有乘客辱罵空姐，仲對其他乘客咆哮；喺溝通同警告無效後，機組人員為咗維護飛行安全，要求該名乘客落機，並通報當地機場航警處理，事件導致航班延誤40分鐘。
乘客未嬲完 返到去上Twitter繼續鬧
網民事發後搵到呢位乘客嘅Twitter，見到呢位乘客當日被趕落機之後，心中嘅怒火仍未平息，仲將相關空姐嘅照片放咗上Twitter公審，話個空姐令佢成為罪犯，火滾到指住台灣嚟開炮：「Thank you Taipei CHINA never be indipendent（應該係想講independent）!」睇嚟怨氣真係好重！
對於有網民質疑佢嘅國籍，女乘客表示自己係真‧日本人。佢解釋自己當時係想搵空姐拎杯水，但就冇人理佢，重申自己當時已經同「所有人」道歉。不過佢嬲到將空姐嘅相放埋上Twitter……咁佢所講嘅「所有人」應該就唔包括個空姐在內嘞。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢 Facebook
▼投資教室 專題研究 YouTube
▼消閒生活 時尚品味 Instagram
