特首喺2022年任內第一份《施政報告》提到，要推出全新「私人發展商參與興建資助房屋先導計劃」，今日（13/6）終於有細節並命名為「樂建居」。計劃分兩種模式，第一種係政府推出土地公開招標，另一種就係鼓勵發展商申請改劃私人土地去起資助房屋。
樂建居計劃細節：單位供應量｜面積｜折扣率｜招標日期
房屋局率先推出兩幅分別位於東涌同柴灣嘅地皮，預計分別提供1,600同700個單位。所有單位實用面積下限係26平方米（約280平方呎），亦要至少七成單位唔可以細過34.8平方米（約375平方呎）。單位會以市價65折發售，折扣率略低過今期以市價62折發售嘅房委會居屋。
購買資格會依循居屋同房屋政策所採用嘅資格準則（包括入息同資產限額）同轉讓限制。如果發展商係用私人土地起資助樓，經房屋局局長批准後可以微調買家資格。
東涌第122區地皮最快會喺2023年年底公開招標，柴灣祥民道嘅地皮就暫定2024年年初招標。房屋局局長何永賢預告之後仲會推第三塊地皮，但未有透露詳細資料。
政府做主導 發展商負責賣樓
為咗保持對房屋供應嘅主導權，政府會要求發展商喺指定時間內一次過推出所有單位發售，避免發展商囤積單位或拖延賣樓，影響本地房屋供應。
雖然政府對售價、單位面積、售樓時間等細節都有明確要求，不過今次唔係政府第一次制定相關限制——睇返政府喺2020年推出第二個「首置上車盤」項目，公開招標出售一幅觀塘安達臣道嘅住宅用地，當時政府都有限制項目單位面積、不同面積單位嘅數量比例，以及項目落成日期，同時規定發展商必須以市價八折賣樓。
冇政府包底 發展商要用靚料靚裝吸引準買家？
何永賢強調，政府唔會回購未售單位；所以發展商除咗要遵守各項條款，仲要諗辦法確保單位可以賣到出去。如果要增加單位對準買家嘅吸引力，發展商可能需要提升用料同設計質素，起碼要高質過房委會居屋先吸引到準買家入場。為咗保障買家，政府仲要求發展商僱用獨立檢查人士做最後驗收。
睇返喺2002年終止咗嘅樂建居前身私人機構參建居屋計劃，唔少項目到依家都仲係好受歡迎，例如有地鐵上蓋優勢嘅鰂魚涌康山花園、睇到海景嘅筲箕灣愛蝶灣同黃竹坑雅濤閣，以及交通方便、鄰近鑽石山站嘅新蒲崗采頤花園，質素全部拍得住私樓。時隔20年，唔知新嘅私人參建居屋仲可唔可以做到當年賣平過市價、質素直逼私樓嘅資助樓呢？
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
