「呢一個estimation我做啦，等你學完其他tasks，再慢慢教你。」一位同事吩咐Wesley。
「知道，多謝。」Wesley心中十分感激。對佢而言，同事嘅幫忙十分可貴，因為喺上一份工作，佢從未得到過。
呢一刻，Wesley更加肯定，佢離開上一份工作係冇錯。
大學畢業後，Wesley得到一間bulge-bracket嘅offer，入職成為Trading Assistant。一開始，佢充滿希望同幹勁，迎接人生新一頁。點知，返咗工兩個月，佢得返壓力同焦慮，仲有一個好差嘅身體。
啱啱開始工作，同事只係簡單講下流程，教佢用system book trade，就返埋位做嘢。Wesley抄筆記都抄唔切，唯有問多兩句，點知換嚟一句：「啱啱講咗啦，你冇專心聽㗎？」搞到佢唔敢再問。去搵SOP，得一份2015年版本，仲要寫得非常簡陋，根本冇答案。喺學習上，佢困難重重。
喺工作上，佢更加多災多難。第一個月，佢未熟習工作內容，上司已經畀咗一堆accounts佢負責，佢完全應付唔到，只有不停犯錯，不停俾人鬧。佢嘗試搵同事幫手，但係同事成日work from home，打畀佢地就一定唔聽電話，根本冇人幫佢。出咗事，上司只係鬧佢，唔去了解背後原因。
短短兩個月，Wesley已經由一位開朗嘅新人，俾人折磨成一部抑鬱嘅機器。有一日，佢向朋友訴苦。
「唉，而家每日我都OT到十一二點，連發夢都係book緊trade，星期日已經開始焦慮，好擔心星期一返工又俾人鬧，真係好辛苦，好想放棄⋯⋯」
「吓，ibank係咁㗎啦，人工包埋㗎。」
「頂埋佢啦，bulge-bracket呀，大把人想入都入唔到，你難得入到，就唔好放棄。」
「你返咗兩個月咋，而家走會太jumpy，刮花你份CV呀，至少頂半年先走啦。」
每一個朋友，都叫佢唔好放棄，令佢更加唔敢辭職。終於，有一日佢犯咗一個錯，因為冇人教過佢要點做，佢做錯咗，上司冇理到，當住全層人鬧到佢喊，佢頂唔住，放工就遞咗信。
返到屋企，佢喊住咁同爸爸講佢真係頂唔住，已經裸辭咗。
「冇事㗎。我撐你。呢一條team咁唔合理，唔值得你留低。」爸爸氣定神閒，欣然接受。
由嗰日開始，Wesley終於唔再焦慮，唔再發惡夢，可以一覺瞓天光。佢休息咗一個月，再次搵工，好快已經得到一間second tier ibank嘅offer，人工低咗少少，但team culture同training好一千倍。
返工頭兩個月，佢主要係做training，同事好肯教，有問必答，仲有完整SOP、教學影片。上司分配嘅工作由淺入深，循序漸進，完全跟得上。星期一至五，Wesley可以準時放工。星期六日，亦可以盡情玩樂，唔再擔心星期一俾人鬧。終於，Wesley明白，其實適當training、良好溝通、合理工作分配，係一條team好基本嘅嘢。之前條team冇，係佢地唔正常。
「唉，終於可以過返正常生活。」Wesley同爸爸講。
「所以其實唔係你太差，係你上一條team太刻薄姐。」
喺工作上遇到困難，好多人唔會裸辭，可能怕手停口停，可能怕刮花CV，可能怕係自己唔挨得。喺呢一個位，建議大家三思，係你唔捱得，定對方唔值得？如果係後者，裸辭並不可恥，而且有用。
【Finance730 專欄作家：林子晞 @hkibankmemes 】
Rebecca的奢侈——著到成身名牌有X用？
Eric的低調——Ibanker有幾囂張就有幾痛
BBA男神投行夢醒——想威不需要做IBD
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
