世界經濟論壇（WEF）發表《2023年全球性別差距報告》，話全球要過多131年，即係2154年先可能實現性別平等。今年嘅預測結果同上年WEF預測嘅132年一致，反映全球未有喺過去一年加快消弭性別差距嘅進度。
WEF嘅「性別差距指數」根據經濟參與和機會、教育程度、健康和生存以及政治參與四個範疇，評估146個國家嘅性別平等程度，1為最高分，表示已實現性別平等，而0就表示完全不平等。
今年嘅全球性別差距指數為68.4%，比上年只係進步咗0.3%。其中冰島憑藉91.2%嘅高分，連續第14年成為性別差距最小嘅國家，亦係唯一一個縮窄咗90%以上性別差距嘅國家。
報告話，雖然教育程度、健康和生存同政治參與嘅性別差距比之前縮窄咗，但經濟參與差距出現倒退。WEF常務董事Saadia Zahidi指出，新冠疫情及經濟、地緣政治危機都破壞咗之前取得嘅性別平等進展，部分地區嘅形勢仲因為新嘅危機爆發而惡化。
東亞性別平等進度停滯不前 日本區內包尾
東亞及太平洋地區嘅性別差距指數為68.8%，喺全球八個地區入面排第五。報告用「停滯不前（stagnating ）」一詞形容東亞太平洋地區喺過去十幾年實現性別平等嘅進展，今年嘅性別差距比上年仲擴大咗0.2個百分點。按照目前進度，東亞太平洋地區需要多189年先可以實現性別平等。
日本嘅性別差距指數只得64.7%，全球排名第125位，成為區內同七大工業國組織（G7）中排名墊底嘅國家。雖然教育程度差距評分高達99.7%，但由於日本到依家都仲未出現過女性首相，而且國會同內閣中嘅女性佔比低，所以政治參與差距指數低到只有5.7%，排喺全球第138位。
中國嘅性別差距指數為67.8%，排喺第107位，名次比上年跌咗五名，甚至低過老撾、越南、泰國、柬埔寨等東南亞國家。中國其中一項排名最低嘅指標係健康和生存中嘅「兩性出生比例」（89.0%），喺146個國家中排名倒數第二。
德國名列前茅 但德國男性認為打女人冇問題？
位居全球第六名嘅德國，性別差距指數為81.5%。就咁睇，德國應該……都算係全球其中一個性別相對平等嘅國家？
不過早排有民調發現，33%嘅德國男性受訪者認為嗌交嘅時候對女性施暴係可接受嘅行為，仲有34%受訪者表示曾經打過佢哋嘅女伴，而施暴嘅主因係希望女性識得「尊重」。至於家庭崗位方面，有超過一半男性希望另一半擔任一個負責湊仔同照顧屋企嘅「賢內助」。專家指出，雖然好多男性聲稱願意促成男女平等，但就唔願意付出實際行動。睇嚟就算係「相對平等」嘅國家，都唔代表一定係一個對女性友善嘅地方。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
