現年80歲嘅「最高齡美國總統」拜登（Joe Biden）今年4月宣佈會喺2024年尋求連任，不過佢最近見記者嘅時候，被發現面上有使用呼吸機嘅壓痕，白宮之後證實拜登最近開始使用呼吸機治療睡眠窒息症，外界再次關注拜登嘅健康狀況，質疑佢係唔係真係可以做多四年總統。
📍細數拜登詭異行為 接連口誤跌倒📍
烏克蘭同伊拉克傻傻分不清 印度同中國都撈亂埋
拜登星期二晚（27日）出席活動嘅時候，一時口快將印度講咗做中國。事隔不足一日，拜登又誤稱俄羅斯總統普京「正在輸掉伊拉克戰爭」——呢次已經唔係拜登第一次搞錯烏克蘭同伊拉克，佢上年11月喺佛羅里達州演講嗰陣，口誤話伊拉克戰爭導致通脹，雖然後尾拜登都有糾正返係「烏克蘭戰爭」，但佢澄清嘅時候越描越黑： 「我之所以諗起伊拉克，係因為伊拉克係我兒子過身嘅地方。」事實上，拜登長子的確曾經喺伊拉克服役，不過後來係因為腦癌喺美國逝世。
跌跌不休 多次喺公開場合同樓梯地面親密接觸
2019年3月，拜登準備乘搭空軍一號前往亞特蘭大，點知佢喺飛機舷梯上連續三次跌低。白宮發言人事後解釋，拜登健康冇問題，佢跌親只係因為太大風。
不過呢陣「風」似乎冇停過，拜登之後多次被影到失平衡，最近一次係今年6月喺空軍學院頒發畢業證書嗰陣，疑似被地下嘅沙包絆跌。
眾目睽睽下拖錯女州長 疑似認錯係自己老婆
上年拜登參觀位於底特律嘅車展，但佢同密歇根州長同行嘅時候，居然直接拖住咗女州長隻手。拖咗8秒之後，拜登先意識到自己拖錯人，即刻扮冇事鬆手。
喺台上斷片 被嘲諷：毛骨悚然又悲哀
拜登上年9月出席全球基金第7次增資會議發表演說，準備落台之際，佢突然停低腳步自言自語，神色茫然，好似喺台上蕩失路咁嘅樣，令網民懷疑拜登係唔係認知能力退化。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
