「識人好過識字。」呢一句喺外資未必啱用。即使係MD介紹你見工，依然要過五關斬六將，先得到offer，有人介紹，只可以加分，唔保證必請。咁係一件好事，以免個個靠關係入職，拉低員工平均表現，亦影響士氣。
不過，呢一句喺中資同港資係適用嘅。大部分情況，只要有高層介紹，可以輕鬆入職。純粹唔知你入到之後，會發生咩事。而Fred嘅部門呢，就出大事啦。
Fred係一間中資銀行嘅Department Head，佢介紹咗一位朋友兒子Louis入職，Louis再帶多三位朋友加入，一共四人空降同一條team，十分離奇。一開始，同事冇乜所謂，諗住新人做得嘢嘅，多啲人手仲好。點知過多一排，發現呢四位新人係大伏！
以Louis為首嘅新人態度惡劣，恃住自己係Fred介紹入嚟，大家唔敢得罪佢，遇見所有問題，一概答唔知。明明工作係Investment Advisory，但唔知咩係Option、咩係FED、而家interest rate幾多、邊個係Powell、咩係NAV。大佬呀，呢啲基本知識，你有心返工就準備下啦⋯⋯
本身同事心地善良，諗住唔識就教，但新人們完全唔肯學。教佢睇下Financial Statement，完全唔肯睇，直接無視你；問佢睇晒一份報告未，答你睇晒，一問內容完全答唔出；連入職必備嘅HKSI paper one考試，佢地都考咗三個月先合格。
情況咁嚴重，唯有Team Head出手啦，Team Head直接命令佢地工作，講明死線前交貨，新人再次無視。
「已經過晒死線，今日放工前你地一定要交。」Team Head鄭重命令新人。
大家估下新人點？佢地趁Team Head去廁所，即刻閃人放工。咁無畏無懼嘅新人，Team Head工作咗十幾年，都係第一次見。
可能你會問：「呢堆新人咁廢，做乜唔向Fred投訴，炒晒佢地四個？」Well，Fred未見過呢四位新人，就請佢地入嚟做嘢，可想而知佢有幾咁不負責任，呢堆蘇州屎，佢又點會理？同新人一樣，無視咪得囉。
除非佢地直接影響到你。
上個月，終於出咗事。Louis聽到Sales話可能要落單，佢冇得到任何確認，直接幫客人落單，而且冇向Team Head、Sales、Operations報告。直到結算當日，Operations同事發現有一單交易要畀錢，覺得好奇怪，向上級報告，大家先知道Louis咁醒，客人冇話落單，佢純粹聽到Sales話可能要落，佢就落咗。咁大家即時unwind返啦，可惜，已經蝕咗大錢。
呢一刻，部門突然有一單incident，仲要有大loss，終於影響到Fred本人，要佢正視問題啦。可惜，錢已蝕，為時已晚。
當一間投資銀行可以靠關係入職，員工有必要警醒，如果只要識人，有關係就可以入嚟做，唔止證明公司嘅人才管理唔妥當，亦表示你地部門嘅業績可以隨時被拖累。
【Finance730 專欄作家：林子晞 @hkibankmemes 】
Betty的乖巧- 你係積極定係做爛巿?(hkibankmemes)
Wesley的逃走｜裸辭不可恥而且有用(hkibankmemes)
Bobby的小機心 – 做義工做到變萬事通(hkibankmemes)
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
