美國加州大學柏克萊分校（University of California, Berkeley，簡稱UC Berkeley）有個工程系研究生，明明屋企住喺洛杉磯，但由於唔想畀貴租喺學校附近租屋，所以決定go to school by空中bus。事主堅持咗成年都冇放棄，仲將呢個咁勵志嘅故事放上Reddit，成為網上熱話。
呢位名為greateranglia嘅Reddit用戶獲UC Berkeley研究生課程錄取，要前往位於三藩市灣區嘅柏克萊市讀書，課程為期一年左右。一般嚟講，其他學生為咗方便返學，都會選擇喺附近搵個地方短租一年，但呢位當事人覺得租屋唔係一個好嘅選擇，仲列出以下理由：
📍事主表示自己好鍾意坐飛機，佢喺之前幾年因為買機票同申請信用卡，所以儲咗好多飛行里數同積分；
📍佢唔諗住喺三藩市長住，畢業之後打算繼續喺洛杉磯做嘢；
📍研究生課程只有10個月，好多時候一個禮拜淨係需要返學校三次。
諗諗下，greateranglia就發現搭飛機返學，分分鐘真係仲抵過喺學校附近租屋，畢竟三藩市灣區寸金尺土，想喺嗰度租樓就要用一大筆錢。為咗慳錢，佢會提早買定平機票，又會用盡飛行里數，再利用埋航空公司嘅改簽機票服務同全額退款政策去配合返自己嘅行程。雖然一開始冇乜人睇好佢，但greateranglia都堅持咗成個學年，仲要冇走過堂，出席率可能仲高過住hall嘅同學。
凌晨三點起身返學 交通時間加埋超過1200小時
成個計劃聽落已經好瘋狂，實踐起嚟更加係困難重重。如果要喺朝早8點準時返到學校，greateranglia需要喺凌晨3:30起身，然後搭5:30嗰班機前往三藩市。佢坦言自己喺交通方面用咗好多時間，因為由屋企到課室，單程交通時間已經要成4至5個鐘。
佢最後做咗個總結，統計咗自己搭飛機返學嘅金錢同時間成本——連埋泊車同油錢，佢總共用咗5,592.66美元，搭咗238次飛機，飛咗92,089英里，交通時間合共75,955分鐘（約52.74日）。
咁對比租屋，佢係唔係真係成功慳到錢呢？有網民留言表示，柏克萊嘅單房平均租金大概係2,295美元，仲未計租屋住要交埋水電煤等雜費，所以事主用搭飛機往返取代租屋，的確為佢慳咗唔少錢。不過由另一個角度諗，事主咁樣飛嚟飛去，其實都犧牲咗自己嘅休息時間，所以就算節省咗住屋成本，依然有唔少網民表示唔認同事主嘅選擇。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
