微博近日發佈一項關於「當代年輕人就業在關注什麼」嘅問卷數據，發現近萬名受訪應屆畢業生中，61.6%受訪者表示就業時會考慮網紅直播等新興職業。莫非做網紅真係好搵得，所以連大學生都考慮靠直播帶貨搵食？
職業發展顧問：反映傳統階層概念被打破 對行業都有好處
有內地職業發展經紀人同人才發展顧問表示，越來越多後生仔加入直播行業，反映佢哋嘅就業認知漸趨多元化，同時呢個趨勢亦係一個積極嘅信號，說明傳統嘅階層概念正在被打破；另一方面，高校畢業生加入直播行業，可能有助提升整體行業嘅質素。
中國直播市場規模龐大 不過粥多僧都多
根據《中國網絡表演（直播與短視頻）行業發展報告（2022-2023）》，中國2022年嘅網絡表演行業市場規模達1992.34億元。雖然市場規模驚人，但參與呢個行業嘅人都多。截至2022年，中國已經開通咗超過1.5億個主播帳號，內容創作者帳號更加超過10億個。
年薪千萬已成過去式 行業內存在「貧富懸殊」現象
由於投身直播產業嘅新人越嚟越多，網絡主播嘅收入都受到影響。央視財經引述浙江杭州一間直播供應鏈企業嘅負責人表示，以前好多主播一年可以賺到一兩千萬，但依家一年可以賺到一兩百萬都好正常；網絡主播嘅收費方式都有改變，例如以前商家搵主播帶貨嘅時候，為咗佔據直播入面某一個時段，所以要先支付「坑位費」，意味住無論銷量多少，主播都一定有錢收，不過依家好多主播已經唔再收取坑位費，改以純佣金嘅方式同商家合作。
如果一年可以賺到一兩百萬，其實都唔算太差啊。問題係，直播行業存在「二八定律」，即係有20%嘅人賺咗80%嘅利潤，唔係個個人入行都可以賺到大錢。
數據顯示，92.5%以直播為主要收入來源嘅主播，月收入只得5000元以下，月入十萬以上嘅網絡主播只係佔0.4%。而且直播行業對年齡都有嚴格限制——64.2%嘅網絡主播都係18至29歲嘅後生仔，有直播帶貨公司甚至規定，主播年齡上限係30歲。呢條網紅路，可能遠比一班畢業生想像中難行。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
