YouTube頻道「微辣Manner」由2013年創立至今，喺YouTube累積咗超過70萬訂閱，係澳門人氣最高嘅YouTube Channel之一。但近日微辣前經理人阿晶因情緒病輕生，其前男友加蔥（林茂發）及其他微辣成員分別因疑似強迫阿晶墮胎同欺凌阿晶而引起公憤。網民喺聲討微辣時起底公司背景，先發現原來微辣嘅商業版圖早就擴張到港澳地區以外，創辦人仲曾經喺訪問中提到公司年收入達八位數！
由網上走向實體 連餐飲業都有涉獵 拍一段片袋7位數
陸志豪（六毫子）同李偉麟（Jacky）喺2013年成立「微辣Manner」團隊，主打拍攝短片同綜藝，隨住channel越做越大、觀眾越來越多，旗下藝人身價都水漲船高，廣告代言接到手軟。有熱心嘅連登網民整合咗同微辣藝人合作過嘅廣告商名單，其中包括Chanel Beuaty、M·A·C、周大福等知名品牌。微辣亦喺港澳兩地舉辦過舞台劇、棟篤笑表演，今年8月仲諗住喺麥花臣舉辦十周年聯歡晚會。
除咗賺廣告同表演收入，微辣都嘗試過進軍飲食業，例如喺2018年主辦微辣美食嘉年華同開設零食店辣記，之後又投入8位數，喺沙田開設同其綜藝節目同名嘅餐廳「微辣大排檔」。
咁多瓣數，到底微辣賺到幾多錢？睇返微辣喺2018年接受傳媒採訪，當時佢哋一年嘅收入已經達8位數，廣告就係佢哋主要嘅收入來源；加上佢哋嘅觀眾遍佈粵港澳地區，所以有過半客源都係澳門以外嘅公司。喺另一次訪問中，六毫子被問到「搵微辣拍一段商業短片要7位數」嘅傳聞，當時六毫子自稱不掌握，但都冇否認到，吸金能力可見一斑。
做YouTuber做到連政府都搵佢哋合作 仲獲批大額補貼
微辣嘅影響力驚人，翻查過往資料，網民發現原來連政府部門都係佢哋嘅客戶之一——喺2017年，香港警隊曾經搵過微辣為警隊製作一段防止罪案宣傳片。到咗2018年，六毫子更被澳門政府委任為新一屆文化產業委員會委員，支持澳門政府發展文創產業。
不過最令人還震驚嘅，應該係微辣曾經獲澳門特區政府「文化發展基金」提供過百萬資助。文化發展基金網站資料顯示，基金喺2017年就大灣區進駐計劃（香港）向微辣文化有限公司發放3,051,897澳門元嘅項目補貼同批出3,000,000澳門元嘅免息貸款；同年又就「『微辣』網絡影音製作及器材設備購買」發放904,573澳門元嘅補貼同2,000,000澳門元免息貸款。就算唔計免息貸款，兩個項目嘅資助金額加埋都有差唔多400萬澳門元。
阿晶出事惹眾怒 網民呼籲抵制微辣合作品牌
阿晶出事之後，網民挖出大量證據指責加蔥同其他微辣成員當初欺凌阿晶，將佢逼上絕路。有網民稱事件為澳門版「黑暗榮耀」，呼籲其他人一齊取消訂閱同抵制微辣。民情洶湧之下，微辣只能宣佈十周年聯歡晚會將會延期，直至另行通知，微辣官網都顯示Error 404。
微辣陷入公關災難，一班廣告商都被拖落水。網上流傳一封署名為「一群愛護阿晶的朋友」嘅公開信，表示會抵制同微辣合作嘅品牌，直到微辣藝人被撤換為止。原本有份贊助十周年show嘅24/7 Fitness已經同微辣割蓆，喺IG宣佈暫停贊助微辣十周年及相關宣傳，24 STORAGE迷你倉都宣佈停止同微辣旗下藝人阿丞嘅所有合作。
雖然微辣眾成員有各自喺唔同渠道回應阿晶嘅死訊，不過微辣官方至今只係出過一篇聲明表達對「前員工」不幸離世嘅遺憾同哀慟，重申微辣冇恐嚇過阿晶，以及宣佈十週年show延期消息，但未有提及公司之後會有咩計劃。
🎓Finance730 x FM財自 首個聯合舉辦講座《財自學院》
有猛人講者 基金經理黃國英 公開最新第四季焦點板塊及投資策略📈
7月31日前報名💰可享早鳥優惠（HK$300）
仲可以同英Sir現場交流🗣
8月19日 英Sir駕到👉https://finance730.com.hk/shop/
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
