國泰航空（293）今年5月因空中服務員疑似歧視非英語乘客而陷入公關災難，事後國泰公開道歉咗四次甚至炒人平息事件。一波未平一波又起，近日又有內地網民自稱因為唔識講廣東話而被國泰空姐歧視，事主大鬧國泰垃圾，但就拒絕國泰跟進事件。
冇片冇錄音 網民仍一面倒撐事主
微博帳號「杰尼龜廚」7月31日發文，話自己當日乘搭CX504航班由香港飛往東京，不過服務ABC位置嘅空姐全程講廣東話，就算事主講咗自己聽唔明，空姐仲係堅持用廣東話溝通，「還有女乘務員用粵語問話，應該是問我喝什麼。我字正腔圓的說：可樂。女乘務員用粵語說說了幾句，我聽不懂，然後她拿起可樂說coke……我不相信現在還有人聽不懂可樂？？非要coke一下？真噁心。」
雖然事主話自己唔係有備而來，所以當時冇錄音、冇拍片，但仍然成功喺微博取暖，有人留言大鬧國泰唔止歧視講普通話嘅乘客，仲歧視所有亞洲人：「除了語言歧視以外，還是出了名的歧視亞洲人的航班」、「國泰就是養蟑螂的公司」、「他家一直這樣，所以我不坐，而且因為服務被罵也不是一回兩回了。」
國泰想跟進 事主憤怒拒絕：唔稀罕處理結果
去到31日夜晚，杰尼龜廚又發文話國泰啱啱DM咗佢，大概意思係請佢提供聯絡方法，國泰會再add事主同交代處理結果，不過怒火中燒嘅杰尼龜廚拒絕理會國泰：「我稀罕你個🔨（錘子）處理結果。愛處理不處理。上次有視頻有錄音的事兒才過去多長時間，反正我這次不是有備而來，沒錄音沒視頻。只有航班號座位號，我不覺得會得到什麼道歉處理。我只能說我以後就用💰投票。」
大部份留言嘅網民都支持事主無視國泰，唔少人認為國泰即使裝模作樣道歉，背後都係會照樣鬧事主搞事，仲話國泰係系統性敵視大陸乘客，屬於政治上嘅問題，睇嚟國泰喺內地網民心目中嘅形象真係差到貼地啊。
出發前抱住試伏心態上機 留港期間因語言不通被趕落的士
事主事後解釋自己本來唔係想幫襯國泰，本來公司出差都係坐全日空（ANA），但今次係訂唔到ANA經濟艙先要改搭國泰嘅航班。可能係因為國泰兩個月前爆出過疑似歧視嘅醜聞，所以事主都相當關注國泰航空嘅服務態度，出發前仲特登出咗個post：「這次頭鐵定了國泰航空。我倒要看看我說日式英語這些服務員會不會對我差別待遇。」
睇返事主微博，原來佢唔止坐飛機遇到語言問題，就連喺香港搭的士都被司機「問候」。事緣佢遇到一位聽唔明普通話又唔識睇簡體字嘅司機，雙方雞同鴨講，事主話司機最後用英文趕佢落車：「我用英文說，我手機可以給你地址和導航。司機就用英文答：我怎麼一邊開車一邊看手機。you should get out my car. 然後我就下車了。」之後事主喺落車時仲因為冇閂實車門而被的士司機用粗口辱罵。不過事主都有提到，香港嘅服務員好友善，冇任何歧視問題，後來再遇到嘅的士司機都好好人，仲一直用唔標準嘅普通話同佢核對地址。
爭議不斷嘅「全球十大航空公司」
其實國泰間唔中就會傳出一啲負面或者奇怪嘅新聞，包括但不限於疫情期間大裁員、被投訴歧視乘客、機師放慢滑行速度疑似「呃鐘」，仲有最近搵見習機師客串擔任地勤。雖然爭議不斷，但國泰航空喺今年6月仍被Skytrax同AirlineRatings評為年度十大最佳航空公司之一，唔知「防止歧視」同「勞資關係」呢兩項條件有冇被列入評選標準呢？
🎓Finance730 x FM財自 首個聯合舉辦講座《財自學院》
有猛人講者 基金經理黃國英 公開最新第四季焦點板塊及投資策略📈
7月31日前報名💰可享早鳥優惠（HK$300）
仲可以同英Sir現場交流🗣
8月19日 英Sir駕到👉https://finance730.com.hk/shop/
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
