憑實力借錢，可能真係唔需要還！江蘇一名男子借咗341枚比特幣畀朋友，點知對方唔肯還，事主唯有將債仔告上法庭，但法院考慮到比特幣嘅性質特殊，於是駁回事主請求，判處債仔無須償還價值7728萬港幣嘅比特幣！
內地《荔枝新聞》報導，江蘇一名林姓男子因為等錢使，於是就問徐姓事主借錢，但事主手頭上冇人民幣，所以就借咗341粒BTC畀林男。可惜好心冇好報，林男冇履行承諾如期還錢，事主唯有向法院求助，要求法院判令林男還返啲比特幣畀佢。
不過江蘇法院審理後，認為比特幣係一種特定嘅虛擬商品，唔具有同貨幣等同嘅法律地位，唔具有法償性同強制性等貨幣屬性，唔可以亦唔應該作為貨幣喺市場上流通使用。法官表示，本案雙方借用比特幣嘅交易行為，目前唔受法律保護；加上比特幣不具有種類物嘅屬性，喺本案中不具有現實嘅可返回性，又無法用法定貨幣進行量化，因此法院駁回事主請求，判處林男毋須償還341枚比特幣。
兩年前官方文件：虛擬貨幣冇法定貨幣嘅法律地位
有網民唔認同法院嘅判決，認為就算比特幣唔具備貨幣性質，但話晒都有價值，法院嘅裁決對事主好唔公平。不過中國人民銀行等部門早喺2021年已經發佈《 關於進一步防範和處置虛擬貨幣交易炒作風險的通知》，強調「虛擬貨幣不具有與法定貨幣等同的法律地位。比特幣、以太幣、泰達幣等虛擬貨幣具有非貨幣當局發行、使用加密技術及分布式賬戶或類似技術、以數字化形式存在等主要特點，不具有法償性，不應且不能作為貨幣在市場上流通使用。」既然官方文件已經寫得咁清楚，就算事主上訴，都未必可以拎得返啲幣喇。
🎓Finance730 x FM財自 首個聯合舉辦講座《財自學院》
有猛人講者 基金經理黃國英 公開最新第四季焦點板塊及投資策略📈
即刻報名現場版💰可以同英Sir現場交流🗣
8月19日 英Sir駕到👉https://finance730.com.hk/shop/
