TFBOYS「十年之約」演唱會喺8月6日於西安奧體中心體育場舉行。自門票開售以嚟，網上就一直流傳住各種關於呢場演唱會嘅傳聞，例如黃牛飛炒到上200萬人民幣一張，同埋連會場外睇到舞台嘅樹都畀黃牛佔據出租，仲有數據顯示，呢場轟動全國嘅演唱會為西安帶嚟4.16億人民幣（約4.52億港元）嘅旅遊收入，當地嘅酒店業同旅遊業簡直賺到笑。
人氣超越周杰倫 168萬人直播收睇演唱會
王俊凱、王源同易烊千璽三人喺2013年以平均12歲嘅年齡組成養成系男團TFBOYS，甫出道已火速爆紅，受歡迎程度可能連香港男子天團Mirror都望塵莫及。當年TFBOYS代表作《青春修煉手冊》入面嘅一句「跟著我左手右手一個慢動作」紅到連唔少香港人都聽過，仲曾經係大學Ocamp必跳熱門舞曲。但三位成員自成年後就開始「單飛不解散」，鮮少公開合體，所以一班四葉草（TFBOYS粉絲稱號）十分期待三人喺演唱會上同台演出。票務網站大麥網嘅資料顯示，截至8月6日，十年之約演唱會獲超過679萬人留低「想看」標記，打破咗周杰倫演唱會嘅紀錄。
據內地媒體《西安發佈》引述第三方統計資料，十年之約演唱會門票收入達3576萬元（人民幣，下同）；而且今次演唱會設有線上付費直播，演唱會期間有超過168萬人喺影音平台優酷上睇live。假設呢批用戶全部都係幫襯最平嘅39元直播plan，淨係直播收入都已經達6552萬元。
多數遊客選擇過夜 酒店割韭菜瘋狂加價
同其他開演唱會嘅明星一樣，TFBOYS嘅名氣（加上四葉草嘅財力）成功帶動西安當地嘅旅遊業同酒店業發展。數據顯示，近八成去西安睇演唱會嘅遊客有留喺西安過夜，平均停留日數為2.36日，仲有48.34%嘅遊客表示有順便參觀埋其他景點。各類消費加埋，呢班fans直接為西安帶嚟4.16億元嘅旅遊收入。
住宿需求高咗，酒店價格自然上升。有內地記者比較過會場附近一間經濟型酒店喺演唱會前後嘅價錢，其大床房價格由原本166元一晚，飆升至1,328元一晚，但附近嘅酒店相當爆滿，遠赴西安追星嘅fans唯有硬食貴價酒店喇。
200萬一張黃牛飛 睇演唱會仲要人面識別
不過酒店再貴，都貴唔過一張演唱會飛。演唱會門票原價由580元到2,013元不等，但根據網上流傳嘅「黃牛價單」，演唱會前五排嘅門票炒到上50萬元，第一行嘅黃牛費更叫價200萬元，夠晒喺內地二三線城市full pay買樓！有黃牛仲出租會場外可以爬樹睇到演唱會嘅位置，租金要成5,000元一粒鐘。
其實大會唔係冇諗過打擊黃牛，今次演唱會已經採取咗強制實名制，觀眾要核對證件、門票同人臉先可以入場。但有黃牛賣家表示，佢哋拎嘅係內部「公關票」，所以不受限制。所謂實名制亦疑似存在漏洞，演唱會當日有觀眾喺網上透露，佢哋拎住紙本門票、經人工通道入場，當時大會冇驗證人臉、只係檢查咗身份證同演唱會飛就放行。不過換個角度諗，假如真係有人幫襯黃牛，用咗過萬元甚至六位數嘅價格買飛，但去到會場外先發現入唔到去，應該真係會崩潰。不如中國都參考吓巴西議員嘅建議，整返個「TFBOYS法案」重罰黃牛，保障返fans嘅權益喇。
有猛人講者 基金經理黃國英 公開最新第四季焦點板塊及投資策略📈
即刻報名現場版💰可以同英Sir現場交流🗣
8月19日 英Sir駕到👉https://finance730.com.hk/shop/
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
