「直播一姐」薇婭喺2021年因為逃稅而被罰款13.41億元（人民幣，下同），之後更被中國所有平台封殺。雖然薇婭已經絕跡幕前，但佢旗下公司近日發布「AI數字人直播業務」同「一站式AI智能直播綜合平台」，疑似想轉戰AI主播帶貨領域，喺呢個新興市場中分一杯羹。
原名黃薇嘅薇婭曾經係中國最出名嘅帶貨主播之一，以2021年「雙11」為例，薇婭淘寶直播銷售額高達82.52億元。不過同年12月。薇婭被揭發偷逃稅款6.43億元，自此之後就被各大平台封殺，消失喺大眾嘅視野中。
雖然薇婭本人冇得出現喺幕前，但佢背後嘅團隊，以及薇婭丈夫董海峰名下嘅杭州謙尋電子商務有限公司並未解散。日前喺杭州「再定義・直播的生命力-2023 AI創新發佈會」上，杭州謙尋旗下嘅子公司「謙語智能」及「羚客」分別發布咗「AI數字人直播業務」及「一站式AI智能直播綜合平台」。
AI主播平過真人幾多？
據《IT之家》報導，謙語智能嘅行政總裁陶亞指出，傳統品牌直播間嘅營運成本高昂，計埋人力、設備、場地等開支，每個月要投入15至25萬元；但有咗AI主播加持，品牌方每個月只需要投入幾千元就可以打造自己嘅直播間，看播時長、轉化率同成交額等數據甚至好過真人直播。董海峰表示，AI數字人具有專業過硬、情緒穩定、永不疲勞嘅特點，可以為企業沉澱可複製、可管理、可迭代嘅數字資產。
其實喺謙語涉足AI主播領域之前，內地嘅電商行業已經開始探索將AI融入直播嘅可能性。有內地多媒體機構負責人喺接受傳媒訪問時指出，中、小主播喺日用百貨領域嘅帶貨能力同數字人主播相若，但整體成本同坑位費（為咗佔據直播入面某個時段所支付嘅費用）就高好多，所以好多品牌開始選擇用虛擬主播去進行全天候帶貨。
不過AI主播都唔係萬能嘅，例如服裝同化妝品品牌比較著重同消費者嘅互動，虛擬主播冇辦法好似真人咁試用產品並實時提供反饋。商家選用AI主播時亦要考慮埋平台方面嘅風險，例如抖音就規定，如果使用已註冊嘅虛擬人形象進行直播，必須由真人驅動進行實時互動，唔允許完全由AI驅動進行互動。虛擬主播嘅技術供應商喺開發時都要留意數字人有冇涉及侵權，如果唔係可能會導致相關帳號被直播平台封鎖。
有猛人講者 基金經理黃國英 公開最新第四季焦點板塊及投資策略📈
即刻報名現場版💰可以同英Sir現場交流🗣
8月19日 英Sir駕到👉https://finance730.com.hk/shop/
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
