入咗行做IBD，Joseph以為會賺到錢，可以瘋狂享受生活。賺到錢係真嘅，但瘋狂享受生活，恐怕係佢太多幻想。
「喂Joseph，下星期除夕船P，準時九點中環上船，十二點維港倒數，預埋你㗎啦！」
「得！到時見！」Joseph一口答應，心諗：除夕喎，我唔倒數，老細都要倒數啦，冇理由八點冇得收工嘅？
過兩日，佢收到一份stock take schedule。
「吓？咩話？除夕冇得早放，元旦又要返工？」Joseph大驚，目瞪口呆望住上司Edwin。
「係呀，搞上市係咁㗎啦。你個客話有幾多貨你又信呀？Sponsor緊係要check下佢有冇吹水啦。」Edwin理所當然咁話：「冇㗎啦，年頭年尾呢啲時間，你一定要stock take，走唔甩。」
「我頂⋯⋯」Joseph望住份stock take schedule，行程密密麻麻，除夕由早上九點排到晚上七點，元旦由早上九點排到中午十二點，完全唔預你除夕玩通宵，心中一堆粗口。
但係，除夕船P錢已畀，冇得退錢。佢只好寄望當日準時收工，趕得切去中環。
除夕當日，Joseph一早起身去荃灣，展開stock take之旅。今次搞上市嘅公司，係一間食品供應商，所以佢地要去唔同嘅工廠、貨倉，盤點一下客人擁有嘅設備同貨品。
第一次stock take嘅Joseph，對呢一個任務冇乜概念，淨係知要去唔同地方，點下貨品，所以佢著得輕巧，方便晚上去party。
一開始，佢地盤點設備，只係去下工廠、影下相、紀錄下，唔太辛苦。之後，佢地盤點乾貨，去到倉庫，地方十分陰森、大塵，又要爬上爬落，作為少爺仔嘅Joseph有少少意外，不過亦接受到。
下午就重頭戲啦——盤點凍貨。作為一間食品供應商，又點可以冇雪藏食物？公司團隊帶一行人嚟到凍倉，一齊喺零下四十度，盤點雪藏食物。
「嘩，阿仔，你條褲咁薄，得唔得㗎？」凍倉員工送上幾件雪褸，見到Joseph著住一條薄到喊嘅西褲，尷尬一笑。
「呀⋯⋯Okay㗎啦。」Joseph面有難色咁話。頂⋯⋯今晚去船P，咪著靚啲囉。
入到去，嘩，真係凍到癲咗。佢地要盤點十款貨，點頭三款，Joseph都仲識一齊數，點第四至六款，Joseph隻手已經僵硬到寫唔到字，點第七至九款，Joseph雙腳結咗冰咁，開始唔太行到，點到第十款，佢頭腦已經唔清醒⋯⋯
「完成！」凍倉員工帶大家出倉，Joseph連歡呼嘅力氣都冇，淨係口震震咁行出倉。
佢仲未得閒感受溫暖，一行人又匆匆忙忙，去下一間倉庫，點算其他貨品。東奔西走到八點，佢地先點好所有貨品。
「好彩只係delay一個鐘，仲嚟得切⋯⋯」正當Joseph搵緊Uber，準備趕返中環上船，收到Edwin嘅來電。
「喂，搞掂啦嗎？記得返公司呀，將今日影啲相同stock take啲文件file好，send返出嚟畀大家睇，費事一陣客人又話我地冇做嘢。」
「呀，知道。」嗚⋯⋯原來未完㗎⋯⋯Joseph欲哭無淚，打畀朋友，叫佢地唔好等自己，就默默地call架Uber返公司，file好今日stock take嘅文件了。
Joseph估唔到，佢入行第一年嘅除夕，係咁特別，可以喺貨倉度過，仲可以體驗零下四十度嘅快感。
而佢亦知道，佢入行第一行嘅元旦，將會一樣特別，可以一大朝早起身，再喺貨倉度過。
【Finance730 專欄作家：林子晞 @hkibankmemes 】
有猛人講者 基金經理黃國英 公開最新第四季焦點板塊及投資策略📈
即刻報名現場版💰可以同英Sir現場交流🗣
8月19日 英Sir駕到👉https://finance730.com.hk/shop/
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
