《彭博》上月引述知情人士指，中國多個茶飲品牌茶百道、滬上阿姨、新時沏及購的蜜計劃來港上市，其中茶百道喺8月15日率先向港交所遞交上市申請。茶百道喺IPO前估值高達175億人民幣，創辦人王霄錕同妻子劉洧宏亦由一間小小茶飲店老闆搖身一變成為億萬富豪，外界估計兩公婆嘅身家已經超過10億美元。
擁逾7,000間門店 加盟成快速擴張關鍵
招股書顯示，截至今年8月8日，茶百道門店數量為7,117間，2022年嘅零售額達133億元人民幣，年度營收42.3億元，淨利潤9.65億元。相比之下，競爭對手奈雪的茶截至2022年年底嘅淨虧損逾4.6億元。據弗若斯特沙利文報告，按2022年嘅零售額計算，茶百道喺中國新式茶飲店市場中排名第三，市場份額達6.6%，僅次於蜜雪冰城同古茗。
茶百道其中一個可以快速擴張嘅關鍵係採取加盟制度，截至2022年，茶百道有6,352間加盟店，但直營店只得9間。不過茶百道並非依賴加盟費維生，根據招股書，2022年茶百道貨品及設備銷售收入為40.2億元，營收佔比為95%。除咗賺取特許權使用費、加盟費，以及向加盟店銷售材料之外，門店設計服務、外賣平台線上營運以及直營店都為茶百道帶嚟收益。
茶百道 vs 奈雪的茶 經營方式大不同
茶百道唔係第一間來港上市嘅中國茶飲連鎖品牌。早喺2021年6月，奈雪的茶已經喺港交所掛牌上市，但茶百道嘅經營策略同奈雪的茶存在極大差異。
以選址同門店面積為例，作為全國最大規模嘅直營茶飲連鎖店，奈雪的茶大部份門店開設於一線或二線城市，其中門店密度最高嘅城市分別係深圳、廣州同上海。喺裝修方面，大部份奈雪的茶嘅門店喺佈置上強調寬敞、舒適，甚至準備埋打卡位。今年7月，奈雪的茶終於宣佈推出「合夥人計劃」接受加盟，不過奈雪的茶依然堅守「大店」理念，要求加盟店單店面積要有90至170平方米，種種條件無疑增加咗店舖嘅營運成本。
但茶百道嘅營運方式更能節省成本，29.1%嘅茶百道門店座落新一線城市（如成都、西安、武漢），二線、三線、四線及以下城市嘅門店各佔約20%，一線城市（北京、上海、廣州及深圳）只佔整體門店選址10.8%。另外，茶百道嘅門店大多為「小店」，截至今年3月底，茶百道有近一半嘅店舖面積小於50平方米，其餘門店嘅面積大概係50至100平方米之間。
由茶飲小店店主到身家過億
茶百道喺2008年由王霄錕同老婆劉洧宏創立，成立時間甚至早過喜茶同奈雪的茶。第一間茶百道開喺四川成都一間中學旁邊，面積連20平方米都冇，係一間面向學生群體、以外賣業務為主嘅中端價位茶飲小店。後來茶百道嘅門店逐漸升級，定位更為明確，再加上之後開放加盟，以及與時並進推出新產品，令茶百道成功走出川渝，成為茶飲界嘅黑馬。
隨住茶百道崛起，王霄錕夫婦嘅身家水漲船高。據《福布斯》估計，王霄錕目前擁有近11億美元嘅淨資產，劉洧宏亦累積咗約7億美元嘅巨額財富。
根據招股書，恆盛合瑞直接持有約67.68%嘅茶百道股權，王霄錕及劉洧宏分別直接持有約18.02%同5.74%股權，茶百道嘅員工激勵平台同創共進直接持有約0.48%股權。成都錦柏森直接擁有恆盛合瑞84.89%股權，而成都錦柏森係由王霄錕夫婦共同全資擁有，同創共進則由王霄錕作為其唯一普通合夥人控制。
