內地一名36歲杜姓男子自稱曾經出任世界500強企業嘅市場總監，但自從公司為咗節省開支而裁走咗佢之後，佢已經失業足足一年。因為年紀問題，就算杜生願意減人工都冇公司肯請佢，於是佢開始從事外賣員工作嚟維持家庭生計，送外賣嘅時候仲會順便送埋自己嘅卡片，希望可以搵到工作機會。
因人工高被開刀 年齡係失業主因
杜生向《九派新聞》透露，佢之前喺一間世界500強公司擔任市場總監，不過公司為咗節約成本決定裁員，杜生同其他人工較高嘅員工就成為公司首要嘅「開刀」對象。
杜生當時仲覺得憑自己嘅經驗同履歷，搵工唔會係咩難事。可惜喺過去一年，佢不斷喺求職過程中受挫，例如招聘職位嘅行業同薪資未必理想，之後杜生不斷降低自己對人工嘅期望，但仲係搵唔到合適嘅職位。
面對眼前嘅困境，杜生認為年齡係佢求職路上嘅阻礙。「好多傳統企業同互聯網公司招聘嘅員工一般唔超過35歲，而且依家資源緊張，競爭越來越激烈，後生仔都搵唔到工，何況我哋呢啲中年人。」
放低身份送外賣維持生計
失業咗一段時間後，杜生開始心急，唔想再一直留喺屋企消耗金錢同心力，於是佢扚起心肝轉行送外賣，每日送30單左右，平均一日賺到80至90元人民幣，一嚟可以幫補家計，二嚟可以接觸唔同崗位，三嚟送外賣會跑到身水身汗，可以當係減肥機會。有時佢仲會趁送外賣嘅時候送埋卡片畀客人，希望會有老細或者HR願意畀個機會佢。
杜生話，自己對外賣員呢個身份唔可以話係適應，只可以話係接受；佢已經完全放低之前做總監嘅工作經歷，因為當生活有壓力嘅時候，身份、身段都係虛嘅。
網民質疑：失業真係年齡問題？
報導出街之後引起網民迴響，有人認同杜生嘅講法，認為過咗30歲就已經陷入就業難嘅困境；有網民慨歎正值壯年嘅男性都咁難搵工，同齡嘅女性就更難喺兼顧家庭同小朋友嘅同時搵到理想嘅工作。
不過有網民質疑杜生嘅經歷，畢竟做到總監呢個等級，冇理由冇存款，要靠送外賣幫補家計。有人就認為杜生失業嘅主因係自身能力不足，「這種就是以前有資源，但是沒有啥能力，現在資源沒有了，就只能送外買了。說明原先的美好生活，是平台公司帶給他的，而不是他自己能力強」。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
