「喂，六點半啦，仲唔起身？」Ben好惡咁拍Ivan張枱。
「起咩身？」Ivan問。
「Project Park個listing dinner呀，再唔到何生唔高興㗎啦！」Ben搶咗Ivan個滑鼠，幫佢save咗份deck，log out埋電腦，要佢即刻出發。Ivan只好起身，同Joseph跟喺Ben後面，出發去一個IPO嘅上市晚宴。
「頂你咩⋯⋯唔係你跟啲project，七點半你死都唔行，自己跟嗰啲，六點半就剷人去listing dinner，你好唔好意思⋯⋯」Ivan一臉無奈。
「星期一先做啦，難得Happy Friday，仲有好嘢食喎！」相反，隔離嘅Joseph一臉興奮。事關佢第一次出席listing dinner，可以去五星級酒店食好嘢，有得睇明星表演，又有得抽獎，仲有得打卡，佢非常期待！
「阿仔，一陣啲嘢食，同你去飲一樣㗎咋，唔使太開心。」
「咁我第一次去listing dinner呀嘛，緊係開心！」Joseph熱情如火。
「唉，唔好興奮過頭出事。」Ivan苦笑。
終於，一行人到咗場地，先嚟一堆合照同交換卡片，然後等客人致詞，就大魚大肉，飲酒作樂。期間，客人仲請咗明星嚟唱歌助慶，Joseph第一次咁近距離見到明星，興奮到癲，人地一落台，即刻衝去排隊合照。
「嘩，呢一張合照真係太珍貴！」Joseph望住手機，雙眼發光。
「嘩，開心啦。」Ivan奸笑。
「開心到爆！」
「你真係好彩，第一次做IPO就上到，又有份去listing dinner。」Ben搭話。
「都要多謝Ben你carry！」
「咁就要飲酒啦！」Ben同Ivan相視而笑，開始灌Joseph 飲酒。Joseph年輕尚小，唔知自己中咗伏，俾人撳住嚟隊，飲過一杯又一杯嘅紅酒，個人變得更加hyper。
直到主持上台，開始抽獎環節，大家先停晒手，睇下自己是否幸運兒。
「今晚嘅獎品非常豐富，除咗有十部iPhone，仲有十份現金獎，最高獎金高達一萬蚊！」
「嘩！正呀！」
主持開始抽獎，Joseph睇住啲iPhone一部一部俾人抽走，越嚟越緊張，終於——
「第三份現金獎五千蚊，得獎者係六號枱嘅Joseph Tsang！」
「嘩！！！」一時之間，六號枱大聲歡呼，Ben、Ivan、Joseph開心到攬作一團，Joseph面都紅晒咁衝上台拎獎，笑到四萬咁口！
「Yeah！」Joseph帶住勝利者嘅笑容返去張枱，今晚嘅收穫太大，佢就快失去理性！
「咁開心，下星期一請全team食飯！」Ben迎接Joseph。
「好！」Joseph一時太得意，又醉醉哋，二話不說答應咗。之後嘅事，佢已經冇晒記憶。
星期一，Joseph返到公司，問Ivan同Ben：「嗰晚中獎之後發生咩事？我淨係記得我中完獎，第二日喺屋企起咗身⋯⋯」
「冇呀⋯⋯哈哈哈哈哈⋯⋯Ben係咁灌你飲酒⋯⋯你又狂飲喎，哈哈哈哈哈哈哈哈哈哈⋯⋯咪醉咗囉。」Ivan笑到手震，拎部手提電話出嚟，入面全部都係Joseph醉咗，俾人抬返屋企啲相。
「頂⋯⋯我頂⋯⋯」Joseph晴天霹靂，望住啲相，畀唔到反應。
「今晚dinner book咗半島，你話你請㗎。」Ben得意咁話。
「頂⋯⋯好似係⋯⋯」Joseph後悔莫及，嗰時太開心，口快答應咗！
之後，全team一行五個人，去半島食自助餐，仲開咗支酒，埋單六千蚊。Joseph望住張單，中咗嗰五千蚊cover唔晒，再望下自己嘅醉酒相，遠遠多過佢同明星嘅合照，四個字——得不償失。
「Well，真係興奮過頭出晒事。」佢苦笑。
【Finance730 專欄作家：林子晞 @hkibankmemes 】
🤫如有雷同、實屬不幸🤫
投資銀行少爺仔Joseph系列故事
投行Business trip無下限 連出差日本都坎坷（林子晞@hkibankmemes）
投行少爺仔初嚐商務旅行「咪對出差有期待」 （林子晞@hkibankmemes）
投行少爺仔Joseph的Stock Take奇妙旅程 – 除夕元旦貨倉過（林子晞@hkibankmemes）
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
