近年內地流行搵志同道合嘅陌生人組成「搭子」關係嘅新文化，唔少年輕人會同搭子結伴食飯、睇戲，甚至一齊去旅行。不過小紅書上尋找旅伴嘅貼文實際上暗藏玄機，如果貼文內有「非綠」、「費用全包」同「限女性」等字眼，咁發文者搵嘅好可能唔係旅伴，而係另一種伴侶關係……
綜合內地媒體報道，小紅書有唔少關於搵旅遊搭子嘅筆記含有涉黃信息。有曾經試過喺小紅書搵旅伴嘅女網民分享咗幾張對話截圖，佢喺對話中被另一名用戶問到係唔係搵「綠色搭子（純友誼關係）」，嚇到個女網民即刻反問對方唔通係想搵「非綠色交易（性服務）」，對方直認不諱，仲好囂張咁話「這個小紅書上不一大堆嗎」、「我還好了，我都提前說了」、「基本上費用全包、限女的，基本上都是，綠色的會在筆記裡說清」。
不過對於用字曖昧嘅「找旅遊搭子」貼文，一眾小紅書用戶似乎早已見怪不怪，甚至會喺評論區交流心得。喺其中一篇小紅書筆記中，樓主就提到「費用全包，不帶薪，有不菲禮物，長期固定」，有另一個用戶回覆：「花了小一萬，兩天手都不給碰，第三天我自己改簽機票回北京了。這種還是得提前說好，不然大冤種。」喺另一篇類似嘅貼文中，有網民留言話想搵「純綠全包旅遊搭子」，但就被其他人潑冷水：「沒有傻子純綠全包的，都是有目的。」
面對「涉黃」指控，小紅書已經作出回應：「關注到有自媒體發布標題為《小紅書『旅遊搭子費用全包』涉黃了》文章，平台高度重視，目前已針對站內『旅遊搭子』相關筆記開展全量回查，尚未定位到文章內所提及用戶反映的問題，一旦查實存在違規內容，將依法依規對違規用戶進行嚴肅處理。平台充分尊重用戶正常的社交需求，也堅決反對各類刻意抹黑和炒作行為，並將通過法律手段維護好用戶和平台的合法權益。」
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
