港府近年積極出招搶人才填補勞動力空缺，希望吸引更多內地專才來港工作。有專才喺小紅書上分享自己喺香港返工嘅心得，喺比較完兩地職場文化同待遇之後，得出「在香港上過班的人，是回不去內地的」嘅結論。
香港工作待遇更好
一位小紅書用戶曾經收到過深圳同香港公司嘅offer，不過就咁睇似乎香港公司嘅待遇好好多——深圳嘅工作只得2日年假，同香港公司開出嘅12日年假差咗足足10日；深圳公司加班冇得補水補假，但香港公司10月就已經出年終獎金；兩間公司都係返朝早9點，但香港公司講明朝九晚六，點都好過可能要沒完沒了加班嘅深圳公司。
香港職場文化更友善
兩地職場連同事之間嘅相處方式都存在極大差異。樓主認為香港嘅同事更有邊界感，大家共事完一段時間都未必知道對方詳細嘅家庭狀況，同事亦唔會輕易過問其他人嘅年齡、人工，相處嘅時候感覺更舒服。
作為職場新人，呢位用戶曾經好怕喺公司問問題，佢表示之前實習嘅時候曾經遇到較嚴格嘅前輩，導致佢一度需要睇心理醫生調整心態。不過佢喺香港工作期間遇到嘅前輩都非常友善，佢仲話自己「在香港的公司被當成人對待」，上司同前輩唔會一味指責同打壓新人，反而會鼓勵佢發問，唔需要為問問題而感到羞愧。
「邊界感」令返工更舒服
有其他用戶都留言支持樓主嘅睇法，喺香港工作，如果遇到啱傾嘅同事可以做朋友，關係一般嘅同事都唔會係咁追問幾時結婚、幾時生仔之類嘅私事；而且香港嘅同事都默認收工之後只會回覆緊急嘅訊息，就算被迫要喺非工作時間聯絡同事，都會覺得非常唔好意思。
有另一名用戶就直轟內地職場冇固定規則，咩都要靠自己爭取，導致職場內卷文化嚴重，企業嘅管理工作亦欠缺規範。
對女性就業更友好
另一名港漂喺分享在港工作嘅好處時提到，香港企業招聘新人嘅性別比例多數都係1:1，唔似某啲內地公司喺校園招聘過程中，只會側重聘請某一性別嘅員工。
對於希望組織家庭或者已經成家立室嘅職場女性嚟講，如果佢哋係喺香港工作，即使到咗適婚或者生育年齡都係可以繼續轉工，公司亦唔會追問女性求職者嘅婚育狀況，女性喺就業過程中唔需要背負不必要嘅壓力。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
