美國一對夫婦喺德國慕尼黑轉機時發現原定要轉乘嘅航班被取消，事後佢哋搵航空公司幫手，諗住重新訂免費機票返屋企，但新嘅預訂紀錄一直被刪除，結果佢哋要額外畀多3,153美元（約24,713港元）先買到回程嘅機票，苦等咗三日時間先飛到返美國。
呢對唔好彩嘅夫婦Emma Giantisco同Dylan Marton向《Insider》透露，佢哋用咗差唔多兩個月嘅時間環遊東南亞，原本打算喺8月17日由新加坡出發，乘搭聯合航空飛往德國慕尼黑，再轉乘漢莎航空返回美國新澤西州。
第一次：因為天氣問題飛唔成
由新加坡飛往慕尼黑嘅過程都好順利，但喺抵達慕尼黑之後，佢哋被告知原本要轉乘嘅航班因為天氣問題被取消。當時佢哋已經上埋機，喺停機坪呆等咗三個鐘頭，但都要再去返航空公司櫃台重新預訂機票。
第二次：漢莎確認完新機票之後 預訂紀錄首次消失
當日天氣惡劣，多班航班被取消，Giantisco眼見有差唔多過千人排緊隊同漢莎航空交涉，於是決定放棄排隊，改用其他方式聯絡航空公司。之後佢哋通過漢莎航空嘅網上對話功能收到關於免費重新預訂已取消航班嘅訊息。航空公司嘅工作人員表示兩日後，即係8月19日會有航班飛往新澤西州，所以Giantisco佢哋打算喺慕尼黑玩多兩日再返美國。
Giantisco表示，雖然佢哋有喺對話中收到有關確認訊息，但佢哋查看帳戶時就見唔到預訂航班嘅紀錄。
第三次：原本分開搭兩班機 預訂紀錄第二次消失
由於Giantisco同Marton嘅機票原本係購自聯合航空，所以佢哋決定打電話向聯合航空求助。聯合航空話佢哋第二日就可以上到飛機，不過佢哋將會分開乘搭唔同嘅航班，兩公婆要分別喺倫敦同休士頓轉機。
為咗盡快返屋企，Giantisco佢哋唯有接受呢個方案。佢哋確認完之後仲上聯合航空嘅官方app檢查多次，今次app入面終於出現咗呢對「苦命鴛鴦」嘅預訂紀錄。
不過Giantisco同Marton第二日喺聯合航空嘅app入面辦理漢莎航空航班嘅登機手續時（兩間公司係合作夥伴），所有相關嘅航班信息又消失咗。好消息係，Giantisco佢哋唔駛分開搭飛機，但壞消息係，佢哋兩個都飛唔成⋯⋯
心急如焚嘅Giantisco先後聯絡聯合航空同漢莎航空，點知兩間公司都話無能為力，聯合叫佢搵漢莎，漢莎就話既然Giantisco係通過聯合訂機票，就應該搵返聯合。Giantisco開埋免提畀兩間航空公司嘅工作人員直接對話，都仲係解決唔到問題。
第四次+第五次：準備搭火車再轉飛機 預訂紀錄第三次+第四次消失
最後漢莎提出為Giantisco佢哋提供前往法蘭克福嘅火車票同由法蘭克福飛往新澤西州嘅機票，心力交瘁嘅Giantisco再次接受咗航空公司嘅方案，準備喺8月20日啟程返屋企。幾個鐘頭後，火車票同機票再次消失喺個app入面⋯⋯
對此，漢莎航空嘅工作人員話聯合航空應該要為佢哋安排回程嘅機票。嘈完一輪之後，漢莎再幫佢哋安排返同一班火車同航班。再隔咗幾個鐘，預訂紀錄又一次離奇消失……
來來回回擾攘咁多日，Giantisco佢哋忍無可忍，唯有自己畀錢，用3,153.5美元訂機票，經倫敦轉機返美國。最神奇嘅係，佢哋返到屋企後，仲係未知自己嘅行李去咗邊。
「我哋差唔多隔日就打畀聯合航空，」Giantisco表示，「佢哋話已經喺倫敦希斯羅機場貼咗告示，但我覺得佢哋應該要喺慕尼黑、休士頓、法蘭克福同火車站都貼上通知。」
聯合航空事後有回覆返Insider：「漢莎航空目前已收到行李，我們正在聯繫客戶，討論下一步行動。」
Giantisco向航空公司提出咗退款要求，好彩航空公司表示佢哋嘅航班、酒店、的士、火車、膳食等額外開支將獲全額報銷。據Giantisco夫婦所講，佢哋嗰幾日一共用咗4,430.79美元（約34,735港元）。但連重訂機票都一波三折，Giantisco懷疑報銷嘅過程可能冇想像中咁簡單。
【更多航空公司相關報導】
全球航空公司排名出爐 國泰終止跌 但仍不敵星航
乘客因座位有嘔吐物要求調位 反被機長以「無禮」為由趕落機
又係國泰 又係歧視？內地網民控訴因不懂粵語被歧視 拒絕國泰跟進
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
