返工要俾老細鬧都算，點知睇直播同買嘢都可能要俾主播鬧。內地「帶貨一哥」李佳琦近日喺直播間宣傳一款眉粉筆時，有觀眾抱怨呢款產品越來越貴，點知過往以「共情能力」建立口碑嘅李佳琦居然直接回擊觀眾「有時候是自己的原因，這麼多年了，工資漲沒漲？」高高在上嘅語氣同唔符合人設嘅言論即刻引起公憤，網民更嘲諷日收入疑似高達508萬人民幣嘅李佳琦係新版「何不食肉糜」。
【更多直播帶貨相關報導】
內地六成畢業生想做網紅 數據：九成主播月入不足五千
逃稅直播一姐借AI還魂 低成本帶貨勢打爛行家飯碗？
抖音名主播自爆月花5,000萬出糧 曾擲過億元建總部帶貨
網民質疑產品越賣越貴 反被指責要喺自己身上搵原因
李佳琦喺9月10日嘅直播間宣傳國貨美妝品牌「花西子」嘅首烏眉粉筆，一支眉粉筆加兩個替換芯嘅直播優惠價為79元（人民幣，下同），而呢一套產品喺淘寶花西子旗艦店嘅售價為95元。可能係因為優惠程度不如預期，有觀眾就留言表示花西子嘅眉筆越賣越貴。
面對觀眾質疑，李佳琦即刻為花西子辯護：「不要亂說，眉筆一直79元，國貨很難的。」仲調返轉頭指責觀眾：「有時候找找自己原因，這麼多年工資漲沒漲，有沒有認真工作。」
近年內地帶貨主播如雨後春筍般湧現，市場競爭相當激烈，但李佳琦多年嚟仍然屹立不倒，主要就係因為佢帶貨時會代入買家角度思考，仲試過直接同觀眾講：「好醜，不要買！」今次佢為咗維護品牌方而「背叛」自己嘅支持者，甚至一臉不耐煩咁對觀眾訓話，令一班網民覺得難以接受。
國貨眉筆仲貴過YSL？同重量計貴黃金1倍
咁到底係網民太苛刻，定係李佳琦反應太大呢？網上有人整合咗各大品牌嘅眉筆價格，就咁睇單價69元一支嘅花西子眉筆（唔包替換芯）其實唔算特別貴，但一支花西子眉筆嘅淨重量只得0.07克，即係平均每克售價為985元，仲貴過單價220元、淨重1.3克嘅YSL眉筆（平均每克169元）。有網民參考埋現時每克約529元嘅黃金價格，發現買一克花西子眉筆嘅錢，已經夠買兩克黃金。
網傳日賺508萬 昔日帶貨一哥變了？
李佳琦喺9月11日凌晨發文就今次風波道歉：「昨天我在直播間回應產品評論時，說了些不恰當、讓大家不舒服的話。今天工作的時候我也一直在反思，在回想，如果我是評論裡的那位女生，會多失望啊。我本就是一個彩妝櫃檯銷售員，深知大家的工作都是辛苦和不容易的。我說的話辜負了你們的期望，真的很抱歉。」
不過唔係所有人都接受李佳琦嘅道歉，有網民認為李佳琦嘅言論非常唔尊重觀眾：「我們只是在討論一件商品的價值，你卻在貶低買商品的這個人的價值？」「花西子 打工人專屬貨幣單位」亦登上微博熱搜榜，花西子成為打工仔新嘅計價單位：「上班一天，賺了一個花西子」、「點了午飯，約0.28個花西子」、「早上花1/10個花西子買個煎餅，一上午活力滿滿的」。
有網民喺微博上轉發一份2021年中國網絡主播年度淨收入排行榜，呢份榜單聲稱位居榜首嘅李佳琦年度淨收入達18.553億元，即係平均每日賺到508萬元。
雖然榜單嘅可信性存疑，但網民嘅怒火徹底被呢個驚人嘅數字點燃：「李佳琦從化妝品櫃檯員成為現在直播界一哥，說到底是吃了時代的紅利，是萬千女孩成就了他，他變了嗎？他沒有，他只是不裝了，無意間說出了心裡話，他不再是當初卑微的打工人了，現在看問題都是以老闆的角度考慮。」
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
