雖然波音(BA.US)積極鼓勵員工重返辦公室工作，但部分高層似乎仲未準備好告別WFH嘅生活，例如波音CEO仍然住喺遠離公司總部嘅私人莊園同度假村，有需要嘅時候先會搭公司安排嘅私人飛機返工。不過就算CEO至今已經飛咗超過400次，總部嘅員工依然冇點見過CEO本人，咁到底CEO飛咗去邊呢？
CEO乘搭逾400次私人飛機 唔係次次都係飛返公司
David Calhoun自2020年開始擔任波音嘅行政總裁。當時受疫情影響，大部份人都需要在家工作，連CEO都唔例外，只係Calhoun嘅兩個「家」同一般人嘅家唔太一樣——一個係位於紐咸西州蘇納皮湖（Lake Sunapee）嘅海濱莊園，另一個係位於南卡羅來納州水牛城（Buffalo）嘅封閉式度假村社區，兩個都係名副其實嘅五星級的家。
《華爾街日報》報導，Calhoun已經使用波音嘅私人飛機飛咗超過400次，不過佢並非每次都係飛往弗吉尼亞州阿靈頓（Arlington）嘅波音總部——飛行紀錄顯示，Calhoun曾經飛往加州、德州同佛羅里達州海岸嘅多個地方，有時仲會飛去歐洲嘅柏林、都柏林同中美洲嘅特克斯與凱科斯群島。
報導指波音嘅董事會為安全起見，要求Calhoun無論係工作定旅行都必須乘搭波音提供嘅私人飛機，所以暫時未知Calhoun商務同私人行程嘅具體比例。
CEO同CFO帶頭在家工作 令員工心生不滿
Calhoun唔係波音高層中唯一「不正」嘅上樑，首席財務官Brian West一樣未有搬離位於康乃狄克州新迦南（New Canaan）嘅屋企。
其實West由屋企出發，只需要步行5分鐘就會返到位於New Canaan嘅波音辦公室。不過呢間辦公室並非為West而設——呢間辦公室係早前波音為咗招聘新任財務主管David Whitehouse而成立嘅辦公室，一年嘅租金10萬美金，但對今年2月正式上任嘅Whitehouse嚟講就夠晒方便，返工只需30分鐘。
有喺總部工作嘅波音員工透露，雖然公司一直鼓勵基層員工返公司辦公，不過身為公司高層嘅Calhoun同West未有以身作則，兩個人都冇乜出現喺公司。
波音嘅經理試過用各種方法吸引員工返office做嘢，例如收工之後大搞Happy hour，同埋將羊駝帶入辦公室，可惜成效未如理想。有工會代表表示，好多員工都抱怨，明明佢哋可以遙距完成工作，但就被告知要返公司做嘢，而CEO就可以隨心所欲咁留喺屋企，間唔中先搭私人飛機返office。部分員工更喺office掛上寫住「Lake Sunapee」嘅告示牌，以及用印有「Love Lake Life」嘅Lake Sunapee紀念杯飲酒，以此諷刺長期唔返工嘅公司高層。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
