疫情完結後，唔少本來可以WFH嘅員工喺老細嘅「鼓勵」下重新返到office工作，不過唔係所有打工仔都接受到呢種轉變，例如Amazon要求員工每周至少有3日返回辦公室，結果有超過30,000名員工簽署請願書，希望公司取消相關規定。雖然Amazon嘅員工對公司嘅新政策非常不滿，但數據顯示，其實比起日日留喺屋企做嘢，大部份打工仔更傾向選擇混合工作模式（hybrid work）。
《Business Insider》報道，53歲嘅Felicia本來以混合模式工作，每星期只有兩日需要返公司，其餘三日都可以WFH，呢種彈性嘅工作模式令佢可以喺工作同生活之間取得完美平衡。不過喺公司要求佢重返office辦公後，Felicia決定辭去呢份年薪超過10萬美元嘅工作，因為佢認為重返office會降低佢嘅工作效率，過長嘅通勤時間亦會對佢造成困擾。
hybrid work比在家工作更受員工歡迎
Felicia可能唔係唯一一個願意放棄高人工換取work-life balance嘅打工仔。美國諮詢公司Gallop早前進行嘅一項調查發現，有59%有得選擇遙距工作嘅美國打工仔傾向以混合模式工作，34%嘅受訪者會選擇完全在家工作，而鍾意返去office工作嘅打工仔只得6%。
打工仔對hybrid work同在家工作嘅執念有幾強？有六成正在遙距辦公嘅員工表示，如果佢哋冇得繼續WFH，佢哋就會考慮搵過第二份工。
80後、90後更傾向選擇hybrid work
其他關於遙距工作嘅調查發現，有近28%嘅千禧世代（Millennials）正以混合模式工作，比例略高於Z世代（25%）及40至49歲嘅受訪者（24%）。LinkedIn編輯George Anders喺調查分析中提及千禧世代更重視彈性工作模式嘅原因：「千禧世代是最有可能成為父母的一代人，對於需要接送小孩的人來說，每星期有兩天可以免於通勤是一個很大的優勢。」
每逢星期一同星期五都唔想返工？
雖然hybrid work嘅員工會準時返工，但每逢星期一同星期五，office都會顯得特別空曠。
《Business Insider》喺LinkedIn上發起投票，結果發現有49%人表示，喺可以選擇嘅情況下，佢哋係絕對唔會喺星期五同星期一返office。Basking收集嘅2023年第二季度辦公室使用率數據亦顯示，一般星期一同星期五嘅訪客會比另外三日少，以北美洲為例，有25%嘅訪客會喺星期三到訪辦公室，而星期一同星期五嘅訪客分別只得17%同12%。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
