經濟唔好，員工都唔敢奢望老細會加人工，但打工仔又有冇諗過會因為業績唔好而被扣近95%嘅人工？內地一間培訓機構喺改革薪資制度後以學生流失為由扣除員工薪水，就連冇份教書、只係負責接待工作嘅員工亦受牽連，月薪被扣到得返257元（人民幣，下同），不過公司仲聲大大唔認錯，堅稱做法合情合理。
事主炎女士喺河南新鄉一間培訓機構工作咗四年半，之前每個月嘅人工介乎3,521元至3,871元之間。不過公司喺今年9月改革咗薪資制度後，炎女士嘅人工就被扣到得返不足300元。炎女士嘅糧單顯示，佢嘅應發工資為4,736元，但「校區正負增長」一欄寫住「-4,100」，工資合計總額為257元。
公司向炎女士解釋，佢嘅月薪係根據9月新實施嘅薪酬制度計算，如果當月學生人數出現負增長就需要扣人工。根據炎女士同公司嘅對話紀錄，流失嘅頭三個學生按每人50元計算，第四至第六個按每人100元計算，第七至第九個按每人150元計算，第十個及之後流失嘅學生會按每人200元計算，由於呢間培訓機構喺嗰個月總共流失咗25名學生，所以炎女士被扣咗4,100元嘅工資。如果不幸走多兩個學生嘅話，唔知要唔要倒貼出返糧畀老細呢？
炎女士認為咁樣扣人工對佢非常唔公平：「有些學生不想學了就走了，每走一個學生，我們老師的薪水就會被扣。 開始的時候說走一個扣50元，後來變成走十個扣200元。我覺得這樣非常不合理，因為我做好了自己的工作，學生流失跟我沒有關係。」
培訓機構嘅工作人員表示，薪資改革係為咗提高老師嘅積極性，而且全員獎金扣罰一致，如果學生人數有正增長，員工都會得到獎勵。工作人員仲話呢項改革已經喺會議上進行公示，並非一言堂決定，公司亦唔係平白無故扣錢，而係因為校區的確流失咗好多學生。
雖然培訓機構覺得自己扣錢扣得有理有據，可惜佢哋嘅說辭說服唔到當地政府。當地勞動監察大隊對事件展開調查後認為，企業可以有自己嘅獎罰制度，但唔可以低於當地最低工資標準，以新鄉為例，每月最低工資應為2000元。
喺勞動監察大隊介入事件後，培訓機構終於跪低：「如果按照《勞動法》的規定，企業確實有不合理的地方，學校會對她的工資進行補償，並馬上調整公司相應的制度，每個月員工的工資不能低於當地工資的最低標準。」
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
