韓國現代汽車(Hyundai)旗下豪車品牌Genesis進軍中國市場後成績未如理想，三年以來虧損咗近30億人民幣。Product賣得咁差通常都同件Product自己有關，但佢哋高層反而喺員工身上搵原因。消息指一名Genesis高層喺內部會議上斥責中國員工對公司冇感情，事關三年嚟，冇一個員工買過自己品牌嘅車。好彩Genesis唔係賣私人飛機、郵輪，如果唔係員工都唔知要工作幾多年，先可以儲夠錢表達自己對公司嘅感情。
三次進軍中國市場仍以失敗告終？
Genesis係韓國現代汽車旗下嘅豪華汽車品牌，定位就好似豐田嘅Lexus或者更貼切係日產嘅Infinity咁，而所謂「豪車」，目標當然係想劍指德國BBA（Benz、BMW、Audi）。Genesis曾經喺2008年及2014年分別以「勞恩斯」及「捷恩斯」嘅名義進入中國市場，可惜銷量未如理想，兩次都黯然退場。
到咗2021年，Genesis再以「捷尼賽思」之名高調宣佈重返中國市場，當時仲用咗3,281架無人機喺上海外灘拼出「你好，中國」嘅標語。但入華三年，Genesis喺中國汽車市場可以話係既冇存在感又冇銷量。有數據顯示，Genesis 2022年喺中國市場嘅銷量只得1,457輛，係目標競爭對手Benz、BMW等品牌嘅銷量零頭都不如。
銷情慘淡 員工有責？
近日有傳即將負責Genesis中國業務嘅韓方首席協調員李哲（Wells Lee）喺召開公司全員大會時透露，Genesis中國業務今年已經虧損咗12億人民幣，三年來加埋蝕咗30億。李哲表示蝕錢嘅主要原因係銷量低迷以及營銷費用高昂，Genesis平均每輛車嘅營銷費用更高達71萬，留意返，佢哋內地有售嘅幾個車型指導價由25萬至116萬不等，亦即係話就算成功賣出一架車都未必夠抵銷賣車成本。
不過比起李哲披露嘅數據，大家更關注佢喺會上對中國員工嘅批評。有消息指李哲喺會議現場斥責中國員工對公司冇感情，三年來冇一個Genesis中國員工買過該品牌嘅車。李哲仲話如果大家依家要離開公司謀求外部發展，佢會表示歡迎。
消息傳出後喺網上引起熱議，有網民表示，Genesis就算銷量唔好，都唔應該期望員工幫手消化庫存，而且Genesis已經唔係第一次進軍中國市場，銷量唔好可能同公司嘅戰略有關，冇理由搵中國員工孭鑊。
韓國車企高層習慣語出驚人？
今次亦唔係韓國車企高層第一次發表爭議言論。今年6月，起亞（Kia）中國首席營運官楊洪海喺出席活動時公然貶低中國車企：「我今年第一季全球賺了21億美金，貼得起中國市場，你本土企業有這些資金實力玩？你先燒死了，我後面再等著進來搶市場也可以。讓敵人先去試傷好了，我兜里都是錢，都是技術，我又沒有放棄這個市場，在合適的時間進來收拾你們也是一種策略。」
楊洪海仲試過喺網上指名道姓抨擊比亞迪老細：「王傳福，請教育好你的團隊，先改變他們那種沒見過世面的土包子的習性。水軍也需要素質，你說我們是棒子車，請先反思一下你的產品？」雖然出位言論為楊洪海同Kia帶來更多曝光機會，但都有唔少人批評楊洪海毫無作為高層應有嘅大局觀。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
