成功靠父/母幹原來唔止買樓，今時今日只要爸爸媽媽夠爭氣，仔女躺平都可以碌入哈佛！有大學招生公司透露，每年約有60名學生被列入哈佛大學嘅神秘「Z名單」，呢班天選之人只需休學一年，就可以入學成為哈佛嘅「尖子」，而且哈佛仲有一套特別嘅統計方法，可以避免呢班成績未夠好嘅官二代、富二代拖低學校嘅排名！
根據大學招生公司Ivy Coach喺網站發佈嘅網誌，喺學生公平錄取組織起訴哈佛大學嘅案件中，有資料顯示每年約有60名學生經哈佛大學嘅「Z名單」獲得入學資格，不過錄取嘅條件係呢班準哈佛學生必須休學一年再入學。
點解要等多一年？《紐約郵報》報導，呢批延遲入學嘅學生會成為所謂嘅「數據幽靈」，即係佢哋同其他新生嘅學術數據會被分開記錄，咁就唔會影響哈佛喺學術評估或大學排名中嘅成績。
入選Z名單要符合邊啲條件？
根據Ivy Coach嘅網誌，入選Z名單嘅學生多數都同哈佛有牢固嘅聯繫，例如係哈佛畢業生嘅子女，甚至係主要校友捐贈者嘅子女。如果被選中嘅學生冇同哈佛相關嘅家庭背景，咁佢哋有可能係來自一個有影響力嘅家庭——要注意，係要有「影響力」，唔係有錢就得。所以Ivy Coach都喺網誌講笑，話如果一個同哈佛唔熟嘅人向哈佛捐贈100萬美元，可能只會得到一封熱情嘅感謝信，但唔會因此而獲得一個入學機會，畢竟哈佛嘅捐贈基金規模超過500億美元，送一百萬可能真係會被學校當係碎銀。
除咗哈佛開後門，《紐約郵報》嘅報導仲提到其他名校亦存在類似嘅神秘招生途徑。報導指由於US News世界大學排名唔會統計轉學生嘅成績數據，所以部分學校會以轉學方式錄取學術表現較差嘅學生，例如康奈爾大學就採用咗一套「保證轉學」系統，成績未如理想嘅學生可以去其他大學讀住year 1先，如果佢哋year 1嘅成績達標（例如平均每科成績有B），就可以作為二年級轉學生被康奈爾大學錄取。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
