大家有冇試過喺Airbnb上搵啱住宿、睇埋圖片、check晒評價，然後喺滿心歡喜準備畀錢時先發現「原來仲要畀清潔費？」嗰吓就好似被人潑冷水咁，原本覺得間房堪稱完美，但加咗清潔費之後即刻點睇都唔順眼。有Airbnb房東代入租客角度，嘗試以「0元清潔費」（即係將原本嘅清潔費加落租金）吸引旅客訂房，結果發現唔止預訂量急升，房客仲會自發清潔房間！
30歲嘅Rachel Boice同丈夫Parker Boice自2021年開始喺Airbnb上出租房源，一開始佢哋同其他房東一樣，會喺出租房間時額外收取清潔費，不過佢哋喺幾個月前重新調整收費——原本Boice夫婦出租嘅玻璃小屋每晚房租為89美元，住客需要畀多40美元作清潔費，但喺Boice夫婦調整價格後，旅客只需要支付129美元嘅租金，唔使再畀多一筆清潔費。
其實Boice夫婦收取嘅費用並冇實質變化，只不過旅客喺名義上唔需要再支付清潔費，但實施新收費後，Boice嘅房源預訂量激增，於是佢哋順勢將每晚房價上調至139美元。
除咗房源比以往更受歡迎，Boice夫婦仲發現停收清潔費後，客人反而更願意主動清潔房間。Rachel認為可能係因為預訂住宿嘅客人覺得佢冇畀錢請人打掃房間，所以自覺有義務盡可能保持房間清潔。
Rachel表示，佢理解點解大多數屋主會收取清潔費：「因為佢哋通常會搵人做清潔，咁樣會增加咗額外費用。」不過Boice夫婦都經常喺Airbnb上預訂其他屋主嘅房源，甚至試過被要求支付高達200美元嘅清潔費，「你會開始思考：『點解我要畀咁多錢？呢啲唔應該係成本嘅一部分咩？』明明我哋可以直接住酒店，仲要唔使畀清潔費喎。」Rachel補充，當客人喺Airbnb睇中住宿並打算預訂時，先發現要支付昂貴嘅清潔費，「感覺有啲唔老實。」
畀完清潔費 仲要自己搞清潔？
高昂清潔費衍生嘅另一個問題，就係有時屋主喺收完錢之後，依然會要求房客喺退房前自己執手尾。曾經有網民喺TikTok上控訴，有房源收取125美元嘅清潔費，但仍然要求住客喺離開之前倒垃圾、除床單，再開埋洗碗機洗碗。
Airbnb喺上年開始嘗試解決部分屋主濫收清潔費嘅問題，例如嚴厲打擊房東嘅不合理要求（包括要求房客喺退房前洗衫同吸塵），以及喺搜尋結果、地圖同篩選器中直接顯示房源嘅稅前總價。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
