時代背景嘅改變，令打工仔嘅心態都出現變化——上一代講求奉獻同奮鬥，做到隻積咁就係為咗升職加薪；但新一代嘅打工仔更重視精神追求同work-life balance，就算有得加人工都未必願意升職。不過唔想晉升唔等同自暴自棄，有職涯啟導教練指出，Z世代上班族唔願意接受晉升機會，理由唔係佢哋想偷懶或者唔上進，而係佢哋發現升職可能不利佢哋發展自己嘅事業！
職涯啟導教練Emily Rezkalla喺接受《Business Insider》訪問時表示，部分人會覺得做更多嘅工作以爭取升職係一種唔值得嘅行為，承受嘅壓力同拎到嘅人工其實不成正比。
Rezkalla自己都試過喺工作中擔任督導者嘅角色，不過佢喺照顧下屬嘅時候，根本冇時間專注於自己嘅事業，佢嘅客戶亦覺得所謂嘅經理職位其實就係負責處理吃力不討好嘅工作，甚至只係職場中負責照顧其他同事嘅保姆。
但唔肯升職係唔係就代表Z世代比較「懶惰」呢？作為職場中最年輕嘅勞動力，好多Z世代打工仔會觀察同聆聽其他資深員工嘅對話，然後會喺唔同渠道討論佢哋觀察到嘅現象，導致佢哋更容易代入管理者嘅角度、睇到管理者正面臨嘅挑戰，從而明白到升職呢條路並唔適合佢哋。
TikTok內容創作者Rod Thill係其中一個唔想升職嘅打工仔，「我強迫自己接受升職，只係為咗證明自己想繼續工作，因為高層認為唔想升職嘅人冇工作動力。」佢對此表示無奈：「打份工啫，有啲人對自己嘅生活方式好滿意，對自己賺到嘅錢都好滿意。明明可以繼續做適合自己做嘅事，點解仲要升職同畀壓力自己，搞到自己咁攰呢？」
有職業顧問認為，老細喺提拔Z世代時，唔應該只係用錢打動員工，更應該提供Z世代所需要嘅支持、培訓，同一個明確嘅未來。
McKinsey今年進行嘅一項調查亦顯示，除咗人工唔夠高之外，仲有其他原因導致Z世代對工作唔滿意，包括缺乏發展同進步空間，以及公司領導層表現得太冷漠；而喺Z世代嘅眼中，有意義嘅工作同職場中嘅靈活性同樣重要。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
