大部份社畜每日工作八個鐘已經精疲力盡，但有部分人會為咗唔同原因，選擇喺正常工作時間內返多份工、袋多份糧，尤其是疫情爆發令遙距工作成為新常態，「過度就業」亦變得更常見。不過有身兼多職嘅打工仔表示，雖然佢哋瞞住老細秘撈，但佢哋都有用心工作，絕對對得住佢哋嘅人工！
為安全感而秘撈
Business Insider報導，軟件工程師Bryan Roque自從喺疫情爆發初期失業後，就意識到自己嘅飯碗唔夠穩陣。其後Roque喺IBM搵到一個遙距工作嘅新職位，但佢喺工作幾個月後又收到Meta嘅offer，而且呢份新工同樣容許Roque在家工作。一般嚟講，想轉工嘅打工仔會先辭咗原本喺IBM嘅工作，再準備返Meta份新工，不過Roque就決定同時返晒呢兩份工，因為咁樣唔止可以多一份收入，仲會有多一層保障！
唔係得Roque一個打工仔選擇「過度就業」（Overemployed，簡稱OE）——Isaac（化名）作為過度就業嘅OG，唔單止喺2021年創建咗一個名為「Overemployed」嘅網站，分享自己秘撈嘅心得，仲喺Reddit上開設咗一個專屬社群，目前已經有超過25萬名成員同Isaac、Roque一齊圍爐取暖。Roque受呢班志同道合之人嘅啟發，喺接受Meta嘅offer之後，仲搵咗一份Tinder嘅新工作，三份工嘅年薪加埋預計超過82萬美元（約640萬港元）。
OE有咩秘訣？
OE最重要嘅就係唔可以畀老細發現自己OE！所以秘撈嘅打工仔需要凍結信貸機構嘅就業歷史同暫停更新自己嘅LinkedIn，而且唔會同屋企人及會計師之外嘅人透露自己嘅工作內容。
除咗隱藏身份，OE人仲需要學識管理好自己嘅時間，例如有啲公司嘅入職流程比較複雜，咁打工仔可能需要預留時間，甚至請假辦理入職手續。OE人亦可以根據時區分配工作，譬如分別按照紐約時間同加州時間辦公。
雖然係一腳踏兩船，不過大部份OE打工仔都認為自己嘅工作表現十分理想，畢竟如果佢哋唔想老細起疑心，咁就一定要畀心機做嘢，令老細搵唔到懷疑嘅理由。同時返緊四份工嘅軟件工程師George（化名）表示：「被斷正嘅人都係衰偷懶，我就從來冇被人發現過，因為我真係有做到嘢。」
OE嘅另一個秘訣就係搵一份適合自己而且較初級嘅工作。Allison喺自己工作嘅領域擁有16年經驗，所以有能力喺短時間內處理好自己嘅工作，「我申請第二份工嘅時候，有事先確保工作內容同我熟悉嘅技能范圍完全吻合。」
OE損害公司利益？被老細發現會有咩後果？
有人認為OE係一種唔道德嘅行為，就算呢班打工仔聲稱自己完成咗份內嘅工作，但老細本來就係出緊全職工作嘅人工畀佢哋，如果老細知道員工可以快速完成工作，咁佢可能會分配更多嘅任務畀員工，並期望員工真係做到「全職工作」，亦即係做足8粒鐘。
Allison都曾經擔心過，喺科技業裁員潮中，佢返多份工係唔係等同剝奪咗其他人嘅就業機會，不過由於Allison嘅丈夫沒有工作，Allison打多份工可以令佢哋嘅家庭擁有正常雙職家庭嘅收入，老公又可以專心照顧屋企人。當其中一份工作嘅老細強迫Allison承擔更多責任，但又拒絕畀佢升職加薪時，Allison亦唔需要再忍受老細嘅無理要求，可以選擇直接辭職走人，因為另一份工作就係佢嘅後路。
如果被老細發現同時返幾份工，員工又會面臨咩後果呢？律師Matthew Berman就話自己從未見過有僱員因為打多份工而被起訴，因為對公司嚟講，起訴員工唔係一個有價值嘅行為。不過OE亦唔係完全冇負面影響，有已經成家立室嘅OE人表示，同時兼顧多項工作其實損害咗佢哋嘅婚姻。加上越嚟越多公司要求員工重返辦公室，OE人好難再好似以前咁瞞天過海。
更多最新最熱最有用財經金融地產資訊 請即登記成為Finance730會員
歡迎讀者投稿，稿件請投至finance730hk@gmail.com
▼追蹤Finance730 動向 官方網頁
▼緊貼最新市場走勢
▼投資教室 專題研究
▼消閒生活 時尚品味
